ସତର୍କତା ସଚେତନତା ସୃଷ୍ଟି ପାଇଁ ପୁରୀ ବେଳାଭୂମିରେ ବାଲୁକା କଳା ସ୍ଥାପନ କଲା ବ୍ୟାଙ୍କ ଅଫ୍ ବରୋଦା
ଭୁବନେଶ୍ୱର / ପୁରୀ, ୧୩ ନଭେମ୍ବର ୨୦୨୬: ରଜତ କୁମାର ମହାପାତ୍ର ଦର୍ଶନ ସମୀକ୍ଷା
ସତର୍କତା ସଚେତନତା ଅଭିଯାନ ୨୦୨୬ର ଅଂଶସ୍ୱରୂପ ବ୍ୟାଙ୍କ ଅଫ୍ ବରୋଦା, ଭୁବନେଶ୍ୱର ରିଜିଅନ୍ ପକ୍ଷରୁ ପୁରୀ ବେଳାଭୂମିରେ ଏକ ଜନସଚେତନତାମୂଳକ ବାଲୁକା କଳା ସ୍ଥାପନ କରାଯାଇଛି। ସଚ୍ଚୋଟତା, ସ୍ୱଚ୍ଛତା ଏବଂ ଦୁର୍ନୀତିମୁକ୍ତ ଶାସନ ବ୍ୟବସ୍ଥାର ମହତ୍ତ୍ୱ ସମ୍ପର୍କରେ ଜନସାଧାରଣଙ୍କୁ ସଚେତନ କରିବା ଏହାର ମୁଖ୍ୟ ଉଦ୍ଦେଶ୍ୟ।
ପ୍ରାୟ ୧୦ ଟନ୍ ବାଲିରେ ନିର୍ମିତ ଏହି ବିଶାଳ ବାଲୁକା କଳାର ଉଚ୍ଚତା ୮ ଫୁଟ୍ ଏବଂ ଲମ୍ବ ୧୭ ଫୁଟ୍। ଏକ ସୃଜନଶୀଳ ଓ ସହଜ ମାଧ୍ୟମ ଜରିଆରେ ପର୍ଯ୍ୟଟକ ଓ ଦର୍ଶକଙ୍କୁ ଆକୃଷ୍ଟ କରିବା ସହ ଦୈନନ୍ଦିନ ଜୀବନରେ ସତର୍କତାର ଗୁରୁତ୍ୱକୁ ପ୍ରତିପାଦିତ କରିବା ଲକ୍ଷ୍ୟରେ ଏହାକୁ ନିର୍ମାଣ କରାଯାଇଛି।
ଆନ୍ତର୍ଜାତୀୟ ଖ୍ୟାତିସମ୍ପନ୍ନ ବାଲୁକା ଶିଳ୍ପୀ ଶ୍ରୀ ମାନସ ସାହୁ ଏହି ବାଲୁକା କଳାର ପରିକଳ୍ପନା ଓ ନିର୍ମାଣ କରିଛନ୍ତି। ଏହି କଳାକୃତି ପୁରୀ ଲାଇଟ୍ହାଉସ୍ ବେଳାଭୂମିରେ ଜନସାଧାରଣଙ୍କ ଦର୍ଶନ ପାଇଁ ଉପଲବ୍ଧ ରହିଛି।
ବ୍ୟାଙ୍କର ଭୁବନେଶ୍ୱର ଜୋନ୍ର ମହାପ୍ରବନ୍ଧକ ତଥା ଜୋନାଲ୍ ମୁଖ୍ୟ ଶ୍ରୀ ଶରତ କୁମାର ପାଣିଗ୍ରାହୀ ଏହି କାର୍ଯ୍ୟକ୍ରମର ଉଦ୍ଘାଟନ କରିଥିଲେ। ଏହି ଅବସରରେ ଭୁବନେଶ୍ୱର ଜୋନ୍ର ଡିଜିଏମ୍ (ସିଏ) ଶ୍ରୀ ରାକେଶ ଝା ଏବଂ ଭୁବନେଶ୍ୱର ରିଜିଅନ୍ର ଡିଜିଏମ୍ ତଥା ଆଞ୍ଚଳିକ ମୁଖ୍ୟ ଶ୍ରୀ ସତ୍ୟରଞ୍ଜନ ମହାପାତ୍ରଙ୍କ ସମେତ ଜୋନାଲ୍ ଅଫିସ୍, ରିଜିଅନାଲ୍ ଅଫିସ୍ ଓ ଭୁବନେଶ୍ୱର ରିଜିଅନ୍ର ବିଭିନ୍ନ ଶାଖାର କର୍ମଚାରୀମାନେ ଉପସ୍ଥିତ ଥିଲେ।
ଉଦ୍ଘାଟନୀ ସମାରୋହରେ ଉଦ୍ବୋଧନ ଦେଇ ଶ୍ରୀ ଶରତ କୁମାର ପାଣିଗ୍ରାହୀ ଦୁର୍ନୀତି ନିରାକରଣ ପାଇଁ ଆଗୁଆ ସତର୍କତାମୂଳକ ପଦକ୍ଷେପ, ନୈତିକ ଆଚରଣ ଏବଂ ଅନୁଷ୍ଠାନଗତ ସ୍ୱଚ୍ଛତାର ଗୁରୁତ୍ୱ ଉପରେ ଆଲୋକପାତ କରିଥିଲେ।
ଏହି ଜନସମ୍ପର୍କମୂଳକ ପଦକ୍ଷେପ ଜରିଆରେ ବ୍ୟାଙ୍କ ଅଫ୍ ବରୋଦା ନୈତିକ ଶାସନ ବ୍ୟବସ୍ଥାକୁ ପ୍ରୋତ୍ସାହନ ଦେବା ସହ ଏକ ସ୍ୱଚ୍ଛ ଆର୍ଥିକ ବ୍ୟବସ୍ଥା ଗଠନରେ ଜନସାଧାରଣଙ୍କ ସକ୍ରିୟ ଅଂଶଗ୍ରହଣ ପ୍ରତି ନିଜର ପ୍ରତିବଦ୍ଧତା ଜାରି ରଖିଛି।
