କାହା ଛତ୍ରଛାୟାରେ ଏସସିବି ସୁପରିଟେଣ୍ଡେଣ୍ଟ!
ଭୁବନେଶ୍ୱର: ପ୍ରଦୀପ କୁମାର ପଣ୍ଡା (ଦର୍ଶନସମୀକ୍ଷା)ଭୁବନେଶ୍ୱର
ଓଡ଼ିଶାର କୋଣ ଅନୁକୋଣରୁ ଗରିବ ଓ ଅସହାୟ ରୋଗୀଟିଏ ଶେଷ ଭରସା ନେଇ ଧାଇଁ ଆସେ କଟକ ବଡ଼ ଡାକ୍ତରଖାନା ବା ଏସସିବିକୁ। କିନ୍ତୁ ଆଜି ଏହି ସ୍ୱାସ୍ଥ୍ୟ ସେବାର ମନ୍ଦିର ବିଭ୍ରାଟ, ଅଘଟଣ ଏବଂ ପ୍ରଶାସନିକ ଦାୟିତ୍ୱହୀନତାର ଏକ ପେଣ୍ଠସ୍ଥଳୀରେ ପରିଣତ ହୋଇଛି। ଟ୍ରମା କେୟାରରେ ଭୟଙ୍କର ଅଗ୍ନିକାଣ୍ଡଠାରୁ ଆରମ୍ଭ କରି ଆଇସିୟୁ ବେଡ୍ରୁ ରୋଗୀ ଖସି ପଡ଼ିବା ପର୍ଯ୍ୟନ୍ତ—ଏସସିବିର ପ୍ରତିଟି ଘଟଣା ଏବେ ସରକାରୀ ବ୍ୟବସ୍ଥାର ଅସଲ ମୁଖା ଖୋଲି ଦେଇଛି। ଏହି ସମସ୍ତ ଅରାଜକତା ପଛରେ ଯାହାଙ୍କ ନାମ ସବୁଠୁ ବେଶୀ ଚର୍ଚ୍ଚା ହେଉଛି, ସେ ହେଉଛନ୍ତି ମେଡିକାଲ ସୁପରିଟେଣ୍ଡେଣ୍ଟ ପ୍ରଫେସର ଡାକ୍ତର ଗୌତମ କୁମାର ଶତପଥୀ। ପ୍ରଶ୍ନ ଉଠୁଛି, ଜଣେ ବିବାଦୀୟ ଏବଂ ଅଯୋଗ୍ୟ ବ୍ୟକ୍ତିଙ୍କୁ କାହା ଇସାରାରେ ଏତେ ବଡ଼ ପଦବୀରେ ବସାଇ ହଜାର ହଜାର ରୋଗୀଙ୍କ ଜୀବନ ସହ ଖେଳ ଖେଳାଯାଉଛି?
୧. ଅଗ୍ନିକାଣ୍ଡ ଓ ଅଘଟଣର ଅସରନ୍ତି ଶୃଙ୍ଖଳା
ନିକଟରେ ଏସସିବି ଟ୍ରମା କେୟାର ୟୁନିଟ୍ରେ ଘଟିଥିବା ଭୟଙ୍କର ଅଗ୍ନିକାଣ୍ଡରେ ୧୨ ଜଣ ରୋଗୀ ଜୀବନ୍ତ ଦଗ୍ଧ ହେବା ଏବଂ ୧୦ ଜଣଙ୍କ ଅବସ୍ଥା ସଙ୍କଟାପନ୍ନ ହେବା କୌଣସି ସାଧାରଣ ଦୁର୍ଘଟଣା ନୁହେଁ, ବରଂ ଏହା ଏକ ‘ସରକାରୀ ହତ୍ୟାକାଣ୍ଡ’। ଆଜି ପୁଣି କାଜୁଆଲିଟିରେ ସର୍ଟ ସର୍କିଟ୍ ଯୋଗୁଁ ନିଆଁ ଲାଗିବା ପ୍ରମାଣ କରୁଛି ଯେ ମେଡିକାଲ କର୍ତ୍ତୃପକ୍ଷ ପୁରୁଣା ଘଟଣାରୁ କୌଣସି ଶିକ୍ଷା ଲାଭ କରିନାହାନ୍ତି।
କେବଳ ଅଗ୍ନିକାଣ୍ଡ ନୁହେଁ, ମାନବୀୟ ସମ୍ବେଦନହୀନତାର ଚରମ ସୀମା ଦେଖିବାକୁ ମିଳିଛି ମେଡିସିନ୍ ୱାର୍ଡରେ। ଜଣେ ମହିଳା ରୋଗୀ ଆଇସିୟୁ ବେଡ୍ରୁ ଛଟପଟ ହୋଇ ତଳେ ଖସି ପଡ଼ୁଥିବା ବେଳେ ଡ୍ୟୁଟିରେ ଥିବା କର୍ମଚାରୀ ମୋବାଇଲ୍ ଦେଖିବାରେ ମଗ୍ନ ଥିଲେ। ଏହି ଘଟଣା ସ୍ପଷ୍ଟ କରୁଛି ଯେ ସୁପରିଟେଣ୍ଡେଣ୍ଟଙ୍କର କର୍ମଚାରୀଙ୍କ ଉପରେ କୌଣସି ନିୟନ୍ତ୍ରଣ ନାହିଁ। ଯେଉଁଠି ଜୀବନ ବଞ୍ଚାଇବା ପାଇଁ ଲଢ଼େଇ ହେବା କଥା, ସେଠି କର୍ମଚାରୀମାନେ ଡ୍ୟୁଟି ଛାଡ଼ି ମଉଜ କରୁଛନ୍ତି।
୨. କିଏ ଏହି ଡାକ୍ତର ଗୌତମ କୁମାର ଶତପଥୀ?
ଏସସିବିର ଏଭଳି ଦୁରାବସ୍ଥା ପାଇଁ ଯାହାଙ୍କ ଅପାରଗତାକୁ ନେଇ ସାରା ରାଜ୍ୟରେ ପ୍ରତିକ୍ରିୟା ପ୍ରକାଶ ପାଇଛି, ସେ ହେଉଛନ୍ତି ପ୍ରଫେସର ଡାକ୍ତର ଗୌତମ କୁମାର ଶତପଥୀ। ଜଣେ ସୁପରିଟେଣ୍ଡେଣ୍ଟ ଭାବେ ତାଙ୍କର ଦେଢ଼ ବର୍ଷର କାର୍ଯ୍ୟକାଳ ଭିତରେ ହସ୍ପିଟାଲର ସୁନାମ ଧୂଳିସାତ ହୋଇଛି।
ତାଙ୍କର ଟ୍ରାକ୍ ରେକର୍ଡକୁ ଅନୁଧ୍ୟାନ କଲେ ଜଣାପଡ଼େ ଯେ ସେ ଜଣେ ଅଭ୍ୟାସଗତ ବିବାଦୀୟ ବ୍ୟକ୍ତି:
- ୨୦୧୭ ବୁର୍ଲା ଭୀମସାର୍ ଷ୍ଟିଙ୍ଗ୍ ଅପରେସନ୍: ବୁର୍ଲାରେ ଅର୍ଥୋପେଡିକ୍ ବିଭାଗରେ ଥିବା ସମୟରେ ସରକାରୀ ଡ୍ୟୁଟି ଫାଙ୍କି ସେ ନିଜ ଘରେ ରୋଗୀ ଦେଖୁଥିଲେ। ତତ୍କାଳୀନ ନିର୍ଦ୍ଦେଶକ ଡାକ୍ତର ଅଶ୍ୱିନୀ ପୂଜାହାରି ତାଙ୍କୁ ରେଡ୍ ହ୍ୟାଣ୍ଡେଡ୍ ଧରି ନିଲମ୍ବିତ କରିଥିଲେ।
- ଘରୋଇ ହସ୍ପିଟାଲ ସହ ସଲାସୁତୁରା: ଏସସିବି ଅର୍ଥୋପେଡିକ୍ ବିଭାଗର ମୁଖ୍ୟ ଥିବା ବେଳେ ଏକ ଘରୋଇ ହସ୍ପିଟାଲକୁ ରୋଗୀ ପଠାଇବା ଏବଂ ଅସାଧୁ କାରବାର ଅଭିଯୋଗରେ ତାଙ୍କୁ ସୁନ୍ଦରଗଡ଼କୁ ବଦଳି କରାଯାଇଥିଲା।
୩. ନିଯୁକ୍ତି ପଛର ‘ରାଜନୈତିକ ଖେଳ’
ଯୋଗ୍ୟତା ଓ ବରିଷ୍ଠତା ନଥାଇ ମଧ୍ୟ ଡାକ୍ତର ଶତପଥୀ କିପରି ଏସସିବିର ସୁପରିଟେଣ୍ଡେଣ୍ଟ ପଦ ହାତେଇଲେ, ତାହା ଏବେ ସବୁଠୁ ବଡ଼ ରହସ୍ୟ। ବିଶ୍ୱସ୍ତ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ସ୍ୱାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗ ତାଙ୍କ ବଦଳି ଫାଇଲ୍କୁ ଦୁଇ ଦୁଇ ଥର ଫେରାଇ ଦେଇଥିଲେ। କିନ୍ତୁ ମୁଖ୍ୟମନ୍ତ୍ରୀଙ୍କ ଦପ୍ତରର (CMO) ଜଣେ ପ୍ରଭାବଶାଳୀ ପରାମର୍ଶଦାତାଙ୍କ ଚାପରେ ମନ୍ତ୍ରୀ ମୁଣ୍ଡ ନୁଆଁଇବାକୁ ବାଧ୍ୟ ହୋଇଥିଲେ। ସରକାରଙ୍କ ଏହି ‘ଗେହ୍ଲାପୁଅ’ଙ୍କ ପଛରେ କେଉଁ ଅଦୃଶ୍ୟ ଶକ୍ତିର ହାତ ଅଛି, ତାହା ଏବେ ବିଧାନସଭାରେ ମଧ୍ୟ ପ୍ରଶ୍ନବାଚୀ ସୃଷ୍ଟି କରିଛି।
୪. ପ୍ରଶାସନିକ ଦାୟିତ୍ୱହୀନତାର ପରିସୀମା
ଟ୍ରମା ଆଇସିୟୁ ଭଳି ଏକ ସମ୍ବେଦନଶୀଳ ୟୁନିଟ୍ରେ ଜଣେ ଜୁନିୟର୍ ଡାକ୍ତରଙ୍କୁ ଇନଚାର୍ଜ ଦାୟିତ୍ୱରେ ରଖିବା ଡାକ୍ତର ଶତପଥୀଙ୍କ ଦାୟିତ୍ୱହୀନତାର ଜ୍ୱଳନ୍ତ ପ୍ରମାଣ। ବିଧାନସଭାରେ ବିରୋଧୀ ଦଳ ଅଗ୍ନିକାଣ୍ଡ ଘଟଣାକୁ ନେଇ ହୁଲସ୍ତୁଲ କରୁଥିଲେ ମଧ୍ୟ ସରକାର ଶତପଥୀଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ନନେବା ‘ଦାଲ୍ ମେ କୁଛ୍ କାଲା ହୈ’ ର ସଙ୍କେତ ଦେଉଛି। ନିଜକୁ କ୍ଷମତାଶାଳୀ ବୋଲାଇ ସେ ଅନ୍ୟ ଡାକ୍ତର ଓ କର୍ମଚାରୀଙ୍କୁ ହଇରାଣ କରୁଥିବା ନେଇ ମଧ୍ୟ ଅଭିଯୋଗ ହେଉଛି।
୫. ସରକାରଙ୍କ ପାଖରେ ଜନତାଙ୍କ ପ୍ରଶ୍ନ
ରାଜ୍ୟ ସରକାର ‘ଆମ ଓଡ଼ିଶା, ନବୀନ ଓଡ଼ିଶା’ ବା ନୂତନ ସରକାରର ‘ସୁଶାସନ’ କଥା କହୁଥିବା ବେଳେ, ଏସସିବି ଭଳି ଗୁରୁତ୍ୱପୂର୍ଣ୍ଣ ସଂସ୍ଥାରେ ଜଣେ ଅଯୋଗ୍ୟ ବ୍ୟକ୍ତିଙ୍କୁ ବସାଇ ରୋଗୀଙ୍କ ଜୀବନ ସହ ଖେଳିବାର ଅଧିକାର ଦେଲା କିଏ? ସ୍ୱାସ୍ଥ୍ୟମନ୍ତ୍ରୀଙ୍କ ନୈତିକ ଉତ୍ତରଦାୟିତ୍ୱ କୁଆଡ଼େ ଗଲା? ଯେଉଁ ବ୍ୟକ୍ତି ପୂର୍ବରୁ ଅସାଧୁତା ପାଇଁ ଦଣ୍ଡିତ ହୋଇଛନ୍ତି, ତାଙ୍କୁ କାହିଁକି ପୁଣି ଥରେ ରାଜ୍ୟର ସବୁଠାରୁ ବଡ଼ ମେଡିକାଲର ଚାବିକାଠି ଦିଆଗଲା?
ପରିବର୍ତ୍ତନର ଆବଶ୍ୟକତା ଏସସିବି କେବଳ ଏକ କୋଠା ନୁହେଁ, ଏହା ଲକ୍ଷ ଲକ୍ଷ ଓଡ଼ିଆଙ୍କ ଆଶା ଓ ଭରସା। ଜଣେ ଅଯୋଗ୍ୟ ବ୍ୟକ୍ତିଙ୍କ ଅପାରଗତା ପାଇଁ ନିରୀହ ରୋଗୀମାନେ ଜଳି ମରିବା ଏବଂ ଅବ୍ୟବସ୍ଥାର ଶିକାର ହେବା ଗଣତନ୍ତ୍ର ପାଇଁ ଏକ କଳଙ୍କ। ସରକାର ଯଦି ତୁରନ୍ତ ଡାକ୍ତର ଗୌତମ କୁମାର ଶତପଥୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ନ ନିଅନ୍ତି ଏବଂ ପ୍ରଶାସନିକ ସଂସ୍କାର ନ ଆଣନ୍ତି, ତେବେ ଆଗାମୀ ଦିନରେ ଜନସାଧାରଣଙ୍କ ଆକ୍ରୋଶରୁ କେହି ବର୍ତ୍ତି ପାରିବେ ନାହିଁ।
Leave a Reply