ବାରଣାସୀରେ ‘ଓଡ଼ିଶା ପରବ’ ଉଦ୍ଘାଟିତ
ବାରଣାସୀରେ | ଭୁବନେଶ୍ବର (୨୨/୦୮): ରଜତ କୁମାର ମହାପାତ୍ର ଦର୍ଶନ ସମୀକ୍ଷା
ବାରଣାସୀରେ ଶନିବାରଠାରୁ ତିନି ଦିନିଆ ‘ଓଡ଼ିଶା ପରବ’ ଆନୁଷ୍ଠାନିକ ଭାବେ ଉଦ୍ଘାଟିତ ହୋଇଯାଇଛି। ଦୀନଦୟାଲ ହସ୍ତକଳା ସଙ୍କୁଲ (ଟ୍ରେଡ୍ ଫାସିଲିଟେସନ୍ ସେଣ୍ଟର ଏବଂ କ୍ରାଫ୍ଟସ ମ୍ୟୁଜିୟମ)ଠାରେ ଅନୁଷ୍ଠିତ ଏହି ମହୋତ୍ସବରେ ଓଡ଼ିଶାର ସମୃଦ୍ଧ ସାଂସ୍କୃତିକ ଐତିହ୍ୟ, ପାରମ୍ପରିକ ହସ୍ତଶିଳ୍ପ ଏବଂ ସ୍ୱାଦିଷ୍ଟ ବ୍ୟଞ୍ଜନର ସମ୍ଭାର ପ୍ରଦର୍ଶିତ ହେଉଛି।
ଓଡ଼ିଶା ସରକାରଙ୍କ ପର୍ଯ୍ୟଟନ ବିଭାଗ ଏବଂ ଫିକି (FICCI) ର ମିଳିତ ଆନୁକୂଲ୍ୟରେ ଆୟୋଜିତ ଏହି ସାଂସ୍କୃତିକ କାର୍ଯ୍ୟକ୍ରମକୁ ଓଡ଼ିଶାର ମାନ୍ୟବର ଉପମୁଖ୍ୟମନ୍ତ୍ରୀ ଶ୍ରୀ କେ. ଭି. ସିଂହଦେଓ ଏବଂ ଶ୍ରୀମତୀ ପ୍ରଭାତୀ ପରିଡ଼ା ଉଦ୍ଘାଟନ କରିଥିଲେ। ଏଥିରେ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ, ହସ୍ତତନ୍ତ, ବୟନଶିଳ୍ପ ଓ ହସ୍ତଶିଳ୍ପ ବିଭାଗ, ମିଶନ ଶକ୍ତି, ଓଆରଏମଏଏସ (ORMAS) ଏବଂ ଓଟିଡିସି (OTDC) ପ୍ରମୁଖ ସହଯୋଗ କରୁଛନ୍ତି।
ସାଂସ୍କୃତିକ ସନ୍ଧ୍ୟାରେ ଉତ୍ତର ପ୍ରଦେଶର ଉପମୁଖ୍ୟମନ୍ତ୍ରୀ ଶ୍ରୀ କେଶବ ପ୍ରସାଦ ମୌର୍ଯ୍ୟ, ପର୍ଯ୍ୟଟନ ମନ୍ତ୍ରୀ ଶ୍ରୀ ଜୟବୀର ସିଂହ, ଶ୍ରମ ମନ୍ତ୍ରୀ ଶ୍ରୀ ଅନିଲ ରାଜଭର, ବିଧାୟକ ଡଃ ଅବଧେଶ ସିଂହଙ୍କ ସମେତ ଦୁଇ ରାଜ୍ୟର ବହୁ ବରିଷ୍ଠ ଅଧିକାରୀ ଯୋଗ ଦେଇଥିଲେ। ଉଭୟ ରାଜ୍ୟ ମଧ୍ୟରେ ସାଂସ୍କୃତିକ ଆଦାନପ୍ରଦାନ ଓ ପର୍ଯ୍ୟଟନର ବିକାଶ ପାଇଁ ଏହା ଏକ ପ୍ରମୁଖ ମାଧ୍ୟମ ବୋଲି ଅତିଥିମାନେ ମତବ୍ୟକ୍ତ କରିଥିଲେ।
ପ୍ରଦର୍ଶନୀର ମୁଖ୍ୟ ଆକର୍ଷଣ:
- ୩୨ଟି ବିଶେଷ ଷ୍ଟଲ୍: ପ୍ରଦର୍ଶନୀରେ ୨୨ଟି ହସ୍ତଶିଳ୍ପ ଏବଂ ୧୦ଟି ଓଡ଼ିଆ ଖାଦ୍ୟ ଷ୍ଟଲ୍ ସ୍ଥାନ ପାଇଛି।
- ହସ୍ତଶିଳ୍ପ ଓ ଜୀବନ୍ତ ପ୍ରଦର୍ଶନ: ପଟ୍ଟଚିତ୍ର, ତାଳପତ୍ର ଖୋଦେଇ, ତାରକସି, ଢୋକ୍ରା ଶିଳ୍ପ, କୋଟପାଡ଼ ବସ୍ତ୍ର ଏବଂ ସମ୍ବଲପୁରୀ ହସ୍ତତନ୍ତର ଜୀବନ୍ତ ପ୍ରଦର୍ଶନ (Live Demonstration) ଦର୍ଶକଙ୍କୁ ଆକୃଷ୍ଟ କରୁଛି।
- ଓଡ଼ିଆ ବ୍ୟଞ୍ଜନ: ପାରମ୍ପରିକ ଓଡ଼ିଆ ଖାଦ୍ୟ, ଦହିବରା ଆଳୁଦମ୍, ପିଠା, ମିଠା, ମାଣ୍ଡିଆ ଜାତୀୟ ଖାଦ୍ୟ ଏବଂ କୋରାପୁଟ କଫିର ସ୍ୱାଦ ନେବାକୁ ଲୋକଙ୍କ ଭିଡ଼ ଜମୁଛି।
- ସାଂସ୍କୃତିକ କାର୍ଯ୍ୟକ୍ରମ: ଓଡ଼ିଶୀ, ଗୋଟିପୁଅ ଏବଂ ସମ୍ବଲପୁରୀ ନୃତ୍ୟ ସହ ବିଭିନ୍ନ ଲୋକନୃତ୍ୟ ପରିବେଷଣ କରାଯାଉଛି।
- ପର୍ଯ୍ୟଟନ ପ୍ରଚାର: ପୁରୀ, କୋଣାର୍କ, ବୌଦ୍ଧ ପରିପଥ (ରତ୍ନଗିରି, ଉଦୟଗିରି, ଲଲିତଗିରି) ଏବଂ ଚିଲିକା, ଭିତରକନିକା ଓ ଶିମିଳିପାଳ ଭଳି ପ୍ରାକୃତିକ ପର୍ଯ୍ୟଟନ ସ୍ଥଳୀର ପ୍ରଚାର କରାଯାଉଛି।
ଆସନ୍ତା ୨୪ ଅଗଷ୍ଟ ପର୍ଯ୍ୟନ୍ତ ଚାଲିବାକୁ ଥିବା ଏହି ମହୋତ୍ସବରେ ସଂସ୍କୃତି, ବ୍ୟଞ୍ଜନ ଓ ହସ୍ତଶିଳ୍ପର ଅନୁଭୂତି ନେବା ପାଇଁ ସମସ୍ତ ସାଧାରଣ ନାଗରିକ ଓ ଦର୍ଶକଙ୍କ ପାଇଁ ପ୍ରବେଶ ମାଗଣା ରଖାଯାଇଛି।
