ବେଙ୍ଗାଲୁରୁର ଭାରତୀୟ ବିଜ୍ଞାନ ସଂସ୍ଥାନରେ ଉନ୍ନତ ସେମିକଣ୍ଡକ୍ଟର ପ୍ରଯୁକ୍ତିବିଦ୍ୟା ଶିଖିଲେ ଓଡ଼ିଶାର ଏକଲବ୍ୟ ଆଦର୍ଶ ବିଦ୍ୟାଳୟ ଛାତ୍ରଛାତ୍ରୀ
ଭୁବନେଶ୍ୱର, ଅଗଷ୍ଟ ୧୨, ୨୦୨୬: ରଜତ କୁମାର ମହାପାତ୍ର ଦର୍ଶନ ସମୀକ୍ଷା
ଓଡିଶାର ଏକଲବ୍ୟ ଆଦର୍ଶ ଆବାସିକ ବିଦ୍ୟାଳୟ (EMRS)ର ପାଞ୍ଚ ଜଣ ମେଧାବୀ ଛାତ୍ରଛାତ୍ରୀ ବେଙ୍ଗାଲୁରୁର ଭାରତୀୟ ବିଜ୍ଞାନ ସଂସ୍ଥାନ (IISc)ର ନାନୋ ସାଇନ୍ସ ଆଣ୍ଡ ଇଞ୍ଜିନିୟରିଂ ସେଣ୍ଟର (CeNSE)ରେ ଏକ ଦୁଇ ଦିନିଆ ସେମିକଣ୍ଡକ୍ଟର ତାଲିମ୍ କାର୍ଯ୍ୟକ୍ରମରେ ଅଂଶଗ୍ରହଣ କରିଥିଲେ । ଛାତ୍ରଛାତ୍ରୀମାନଙ୍କୁ ସେମିକଣ୍ଡକ୍ଟର ବିଜ୍ଞାନ, ଉନ୍ନତ ଗବେଷଣା ସୁବିଧା, କ୍ଲିନ୍-ରୁମ୍ ପ୍ରଯୁକ୍ତିବିଦ୍ୟା କ୍ଷେତ୍ରରେ କ୍ୟାରିଅର ସୁଯୋଗ ପ୍ରଦାନ କରିବା ପାଇଁ ଆଦିବାସୀ ବ୍ୟାପାର ମନ୍ତ୍ରଣାଳୟ ଦ୍ୱାରା STEM ପଦକ୍ଷେପ ଅଧୀନରେ ଏହି କାର୍ଯ୍ୟକ୍ରମ ଆୟୋଜନ କରାଯାଇଥିଲା ।
ଏହି ତାଲିମ୍ କାର୍ଯ୍ୟକ୍ରମରେ EMRS, ଗିଧିବାସର ପ୍ରବୀଣ କୁମାର ନାୟକ ଏବଂ ଗୀତାଞ୍ଜଳି ମହନ୍ତ, EMRS, ବହଲଦାର ଦୁଷ୍ମନ୍ତ ମାଝୀ, ଏବଂ EMRS, ଧାଙ୍ଗେରାର ହୀରାମଣି ବାସ୍କେ ଏବଂ ଫୁଲମଣି ସିଂ ଭାଗ ନେଇଥିଲେ । EMRS, ଗିଧିବାସର ଦେବସ୍ମିତା ପ୍ରିୟଦର୍ଶିନୀ ବେହେରା ଛାତ୍ରଛାତ୍ରୀମାନଙ୍କ ସହିତ ଏସ୍କର୍ଟ ଶିକ୍ଷୟିତ୍ରୀ ଭାବେ ଗସ୍ତ କରିଥିଲେ ।
ପ୍ରଥମ ଦିନରେ ଛାତ୍ରଛାତ୍ରୀମାନେ ସେମିକଣ୍ଡକ୍ଟର ପ୍ରଯୁକ୍ତିବିଦ୍ୟା, କ୍ଲିନ୍-ରୁମ୍ ସୁରକ୍ଷା, ପ୍ରଦୂଷଣ ନିୟନ୍ତ୍ରଣ ଏବଂ ୱେଫର ପ୍ରକ୍ରିୟାକରଣ ଶିଖିବାକୁ ପାଇଥିଲେ । ଛାତ୍ରଛାତ୍ରୀମାନେ ସ୍ୱତନ୍ତ୍ର ଅପ୍ଟିକ୍ସ, ବୈଦ୍ୟୁତିକ, ଯାନ୍ତ୍ରିକ, ଟ୍ରାନ୍ସମିସନ୍ ଇଲେକ୍ଟ୍ରୋନ୍ ମାଇକ୍ରୋସ୍କୋପି (TEM) ଏବଂ ସ୍କାନିଂ ଇଲେକ୍ଟ୍ରୋନ୍ ମାଇକ୍ରୋସ୍କୋପି (SEM) ପ୍ରୟୋଗଶାଳା ମଧ୍ୟ ପରିଦର୍ଶନ କରିଥିଲେ । ଉନ୍ନତ ବୈଜ୍ଞାନିକ ଉପକରଣ, ଗବେଷଣା ସୁବିଧା ଏବଂ ପ୍ରୟୋଗଶାଳା ଅଭ୍ୟାସ ଦେଖିଥିଲେ ।
ଦ୍ୱିତୀୟ ଦିନରେ ସେମିକଣ୍ଡକ୍ଟର ନିର୍ମାଣ ଏବଂ ସମ୍ପୂର୍ଣ୍ଣ ଉତ୍ପାଦନ ପ୍ରକ୍ରିୟା ଉପରେ ଧ୍ୟାନ ଦିଆଯାଇଥିଲା । ଛାତ୍ରଛାତ୍ରୀମାନଙ୍କୁ କ୍ଲିନ୍-ରୁମ୍ ପରିବେଶ, ସଠିକ୍ ଉତ୍ପାଦନ କୌଶଳ ଏବଂ ସୁରକ୍ଷା ପ୍ରୋଟୋକଲ ସହିତ ପରିଚିତ କରାଯାଇଥିଲା । ଏଥି ସହିତ ଭାରତର ପ୍ରଯୁକ୍ତିବିଦ୍ୟା ଏବଂ ରଣନୈତିକ ବିକାଶରେ ସେମିକଣ୍ଡକ୍ଟରର ଗୁରୁତ୍ୱ ବିଷୟରେ ମଧ୍ୟ ଶିକ୍ଷା ଦିଆଯାଇଥିଲା । ଛାତ୍ରଛାତ୍ରୀମାନଙ୍କୁ ଉଚ୍ଚଶିକ୍ଷା ଗ୍ରହଣ କରିବାକୁ ଓ ବିଜ୍ଞାନ, ପ୍ରଯୁକ୍ତିବିଦ୍ୟା, ଇଞ୍ଜିନିୟରିଂ ଏବଂ ଗବେଷଣାରେ କ୍ୟାରିଅର ଗଢିବାକୁ ଉତ୍ସାହିତ କରିବା ପାଇଁ ଏକ ସ୍ୱତନ୍ତ୍ର କ୍ୟାରିଅର ମାର୍ଗଦର୍ଶନ ଏବଂ ପରାମର୍ଶ ଅଧିବେଶନ ଆୟୋଜନ କରାଯାଇଥିଲା । ଏହି ପଦକ୍ଷେପ ଆଦିବାସୀ ଛାତ୍ରଛାତ୍ରୀମାନଙ୍କୁ ଅତ୍ୟାଧୁନିକ ବିଜ୍ଞାନ ଏବଂ ପ୍ରଯୁକ୍ତିବିଦ୍ୟା ସହିତ ଜଡିତ କରିବା ପାଇଁ ଅଧିକ ସୁଯୋଗ ସୃଷ୍ଟି କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ।
ରୋଜାଲିନ୍ ସାହୁ
ଲୋକସମ୍ପର୍କ ଅଧିକାରୀ
ଅନୁସୂଚିତ ଜନଜାତି, ଅନୁସୂଚିତ ଜାତି ଉନ୍ନୟନ,
ସଂଖ୍ୟାଲଘୁ ସମ୍ପ୍ରଦାୟ ଓ ପଛୁଆ ବର୍ଗ କଲ୍ୟାଣ ବିଭାଗ
Leave a Reply