ଦେଶର ପ୍ରଥମ ମହିଳା ଜାତୀୟ ଉପସଭାପତି ଭାବେ ନିର୍ବାଚିତ ହେଲେ ଜୟଶ୍ରୀ ଗରନାୟକ
ନୂଆଦିଲ୍ଲୀ/ଭୁବନେଶ୍ୱର: ରଜତ କୁମାର ମହାପାତ୍ର ଦର୍ଶନ ସମୀକ୍ଷା
ଭାରତର ସମବାୟ ଆନ୍ଦୋଳନ ଏବଂ ମତ୍ସ୍ୟଜୀବୀ ସମ୍ପ୍ରଦାୟ ପାଇଁ ଏକ ଐତିହାସିକ ସଫଳତା ଆଣିଛନ୍ତି ଓଡ଼ିଶାର ବିଶିଷ୍ଟ ସମବାୟ ନେତ୍ରୀ ଶ୍ରୀମତୀ ଜୟଶ୍ରୀ ଗରନାୟକ। ସେ ନ୍ୟାସନାଲ ଫେଡେରେସନ ଅଫ୍ ଫିସରମେନ୍ସ କୋଅପରେଟିଭ୍ସ ଲିମିଟେଡ୍ (ଫିଶକୋଫେଡ୍ – FISHCOFED)-ର ଜାତୀୟ ଉପସଭାପତି (Vice Chairperson/Vice President) ଭାବେ ନିର୍ବାଚିତ ହୋଇ ଇତିହାସ ରଚିଛନ୍ତି। ଏହି ସର୍ବଭାରତୀୟ ସଂସ୍ଥାର ଇତିହାସରେ ଏହି ସମ୍ମାନଜନକ ପଦବୀରେ ନିର୍ବାଚିତ ହେବାରେ ସେ ଦେଶର ପ୍ରଥମ ମହିଳା ସମବାୟ ନେତ୍ରୀ ହୋଇଛନ୍ତି।
ତାଙ୍କର ଏହି ଐତିହାସିକ ବିଜୟ ସମଗ୍ର ଦେଶରେ ସମବାୟ କ୍ଷେତ୍ର, ମତ୍ସ୍ୟଜୀବୀ ସଂଗଠନ ଓ ସାମାଜିକ ମହଳରେ ଉତ୍ସାହର ଲହରୀ ସୃଷ୍ଟି କରିଛି। ଏହା କେବଳ ଜଣେ ବ୍ୟକ୍ତିଙ୍କ ସଫଳତା ନୁହେଁ, ବରଂ ସମବାୟ କ୍ଷେତ୍ରରେ ମହିଳାଙ୍କ ନେତୃତ୍ୱ, ଦକ୍ଷତା ଓ ଅବଦାନର ଏକ ଐତିହାସିକ ସ୍ୱୀକୃତି।
ଏହି ଉଲ୍ଲେଖନୀୟ ସଫଳତା ପରେ ଦେଶର ବିଭିନ୍ନ ପ୍ରାନ୍ତରୁ ବିଶିଷ୍ଟ ରାଜନେତା, ସମବାୟ ନେତୃବୃନ୍ଦ ଓ ସାମାଜିକ ସଂଗଠନମାନଙ୍କ ପକ୍ଷରୁ ତାଙ୍କୁ ଶୁଭେଚ୍ଛାର ସୁଅ ଛୁଟିଛି।
ଭାରତ ସରକାରଙ୍କ କେନ୍ଦ୍ର ସମବାୟ ରାଷ୍ଟ୍ରମନ୍ତ୍ରୀ ଶ୍ରୀ ମୁରଲୀଧର ମୋହୋଲ ଶ୍ରୀମତୀ ଗରନାୟକଙ୍କୁ ତାଙ୍କର ଏହି ଐତିହାସିକ ବିଜୟ ପାଇଁ ଆନ୍ତରିକ ଅଭିନନ୍ଦନ ଜଣାଇଛନ୍ତି। ଏହାପରେ ସେ ଶ୍ରୀମତୀ ଗରନାୟକ ଏବଂ ଫିଶକୋଫେଡ୍ର ନବନିର୍ବାଚିତ ନେତୃତ୍ୱ ଦଳ ସହ ଆଲୋଚନା କରି ଦେଶର ମତ୍ସ୍ୟଜୀବୀ ସମବାୟ ସଂସ୍ଥାଗୁଡ଼ିକର ସଶକ୍ତିକରଣ, ମତ୍ସ୍ୟ ଚାଷର ବିକାଶ ଓ ମତ୍ସ୍ୟଜୀବୀଙ୍କ ସାମଗ୍ରିକ କଲ୍ୟାଣ ପାଇଁ ଆଗାମୀ କାର୍ଯ୍ୟଯୋଜନା ଉପରେ ବିସ୍ତୃତ ମତବିନିମୟ କରିଥିଲେ।
ଶ୍ରୀମତୀ ଜୟଶ୍ରୀ ଗରନାୟକଙ୍କ ଏହି ସଫଳତା ତାଙ୍କର ଦୀର୍ଘ ବର୍ଷର ସମର୍ପଣ, ସଂଗଠନ କୌଶଳ, ଦୂରଦର୍ଶୀ ନେତୃତ୍ୱ ଓ ସମବାୟ ଆନ୍ଦୋଳନ ପ୍ରତି ନିରନ୍ତର ସେବାର ଫଳସ୍ୱରୂପ ବୋଲି ବିଭିନ୍ନ ମହଳରେ ମତ ପ୍ରକାଶ ପାଇଛି।
ଜାତୀୟ ସ୍ତରକୁ ଯିବା ପୂର୍ବରୁ ସେ ଓଡ଼ିଶାର ସମବାୟ କ୍ଷେତ୍ରରେ ଅନେକ ଗୁରୁତ୍ୱପୂର୍ଣ୍ଣ ଦାୟିତ୍ୱ ସଫଳତାର ସହିତ ତୁଲାଇଥିଲେ। ସେ ଖୋର୍ଦ୍ଧା ଜିଲ୍ଲା କେନ୍ଦ୍ରୀୟ ସମବାୟ ବ୍ୟାଙ୍କର ଉପସଭାପତି ଭାବେ କାର୍ଯ୍ୟ କରି ଗ୍ରାମାଞ୍ଚଳରେ ସମବାୟ ବ୍ୟାଙ୍କିଙ୍ଗ୍ ବ୍ୟବସ୍ଥାର ବିକାଶ ଓ ସଦସ୍ୟମାନଙ୍କ ଆର୍ଥିକ ସଶକ୍ତିକରଣରେ ଉଲ୍ଲେଖନୀୟ ଅବଦାନ ରଖିଥିଲେ।
ସେହିପରି ସେ ଓଡ଼ିଶା ରାଜ୍ୟ ସମବାୟ ବ୍ୟାଙ୍କର ନିର୍ଦ୍ଦେଶିକା ଭାବେ ରାଜ୍ୟର ସମବାୟ ବ୍ୟବସ୍ଥାକୁ ସୁଦୃଢ଼ କରିବା ଦିଗରେ ନୀତିଗତ ନିଷ୍ପତ୍ତିରେ ସକ୍ରିୟ ଭୂମିକା ନିଭାଇଥିଲେ।
ମତ୍ସ୍ୟ କ୍ଷେତ୍ରରେ ମଧ୍ୟ ତାଙ୍କର ଅବଦାନ ଅତ୍ୟନ୍ତ ଉଲ୍ଲେଖନୀୟ। ଫିଶରିଜ୍ ଓଡ଼ିଶା କୋଅପରେଟିଭ୍ କର୍ପୋରେସନ୍ ଲିମିଟେଡ୍ (FISHFED)-ର ନିର୍ଦ୍ଦେଶିକା ଭାବେ ସେ ମତ୍ସ୍ୟଜୀବୀଙ୍କ କଲ୍ୟାଣ, ଆଧୁନିକ ମତ୍ସ୍ୟଚାଷ, ବଜାର ବ୍ୟବସ୍ଥାର ସୁଦୃଢ଼ୀକରଣ ଏବଂ ସରକାରୀ ଯୋଜନାର ସଫଳ ରୂପାୟନ ପାଇଁ ନିରନ୍ତର କାର୍ଯ୍ୟ କରିଆସିଛନ୍ତି।
ତୃଣମୂଳ ସ୍ତରରେ ମଧ୍ୟ ତାଙ୍କର ନେତୃତ୍ୱ ଅତ୍ୟନ୍ତ ପ୍ରଶଂସନୀୟ। ସେ ଓମ୍ ସାଇ ମଲ୍ଟିପର୍ପୋଜ୍ ପ୍ରାଥମିକ ମତ୍ସ୍ୟଜୀବୀ ସମବାୟ ସମିତି ଲିମିଟେଡ୍-ର ସଭାପତି ଭାବେ ମତ୍ସ୍ୟଜୀବୀ ପରିବାରମାନଙ୍କ ଆର୍ଥିକ ବିକାଶ, ରୋଜଗାର ସୃଷ୍ଟି ଓ ସମବାୟ ଭିତ୍ତିକ ଉନ୍ନୟନ ପାଇଁ ଅନେକ ସଫଳ ପଦକ୍ଷେପ ଗ୍ରହଣ କରିଛନ୍ତି।
ଏହାଛଡ଼ା ସେ ଭୁବନେଶ୍ୱର ଡିଷ୍ଟ୍ରିବ୍ୟୁସନ୍ ଡିଭିଜନ୍ କୋଅପରେଟିଭ୍ ସୋସାଇଟି ଲିମିଟେଡ୍-ର ସଭାପତି ଭାବେ ମଧ୍ୟ ଦାୟିତ୍ୱ ନିର୍ବାହ କରି ସମବାୟ ସଂଗଠନକୁ ଅଧିକ ସଶକ୍ତ ଓ ଜନମୁଖୀ କରିବାରେ ସଫଳ ହୋଇଛନ୍ତି।
ସମବାୟ କ୍ଷେତ୍ରରେ ତାଙ୍କର ସ୍ୱଚ୍ଛ ଭାବମୂର୍ତ୍ତି, ଦୂରଦର୍ଶୀ ନେତୃତ୍ୱ, ସାଧାରଣ ଲୋକଙ୍କ ପ୍ରତି ସମର୍ପଣ ଏବଂ ମହିଳା ସଶକ୍ତିକରଣ ପ୍ରତି ତାଙ୍କର ଅଙ୍ଗୀକାର ତାଙ୍କୁ ଜାତୀୟ ସ୍ତରରେ ଏକ ସ୍ୱତନ୍ତ୍ର ପରିଚୟ ଦେଇଛି।
ଫିଶକୋଫେଡ୍ର ଜାତୀୟ ଉପସଭାପତି ଭାବେ ତାଙ୍କର ନିର୍ବାଚନ ଦେଶର ମତ୍ସ୍ୟଜୀବୀ ସମବାୟ ସଂସ୍ଥାଗୁଡ଼ିକର ବିକାଶ, ଆଧୁନିକୀକରଣ, ମହିଳାଙ୍କ ଅଧିକ ସହଭାଗିତା ଏବଂ ମତ୍ସ୍ୟଜୀବୀଙ୍କ ଆର୍ଥିକ ସଶକ୍ତିକରଣ ଦିଗରେ ଏକ ନୂତନ ଅଧ୍ୟାୟର ସୂଚନା ବୋଲି ବିଶେଷଜ୍ଞମାନେ ମତ ପ୍ରକାଶ କରିଛନ୍ତି।
ଓଡ଼ିଶା ପାଇଁ ମଧ୍ୟ ଏହା ଗର୍ବ ଓ ଗୌରବର ବିଷୟ। ଜଣେ ଓଡ଼ିଆ ମହିଳା ସମବାୟ ନେତ୍ରୀଙ୍କ ଏହି ଐତିହାସିକ ସଫଳତା କେବଳ ରାଜ୍ୟ ନୁହେଁ, ସମଗ୍ର ଦେଶର ମହିଳାମାନଙ୍କ ପାଇଁ ପ୍ରେରଣାର ଉତ୍ସ ପାଲଟିଛି।
ଶ୍ରୀମତୀ ଜୟଶ୍ରୀ ଗରନାୟକଙ୍କ ଏହି ଐତିହାସିକ ନିର୍ବାଚନ ଭାରତର ସମବାୟ ଆନ୍ଦୋଳନରେ ଏକ ସ୍ୱର୍ଣ୍ଣିମ ଅଧ୍ୟାୟ ଭାବେ ସ୍ମରଣୀୟ ହୋଇ ରହିବ।
Leave a Reply