ବିଶ୍ୱ ମଧୁମେହ ଦିବସରେ ଉତ୍କଳ ହସ୍ପିଟାଲ ପକ୍ଷରୁ ୩ କି.ମି. ପଦଯାତ୍ରା; ପ୍ରାୟ ୧୦୦୦ ଲୋକଙ୍କ ଅଂଶଗ୍ରହଣ
ଭୁବନେଶ୍ୱର, ତାରିଖ: ୧୪.୧୧.୨୦୨୬: ରଜତ କୁମାର ମହାପାତ୍ର ଦର୍ଶନ ସମୀକ୍ଷା
ଓଡ଼ିଶାର ଅନ୍ୟତମ ଅଗ୍ରଣୀ ସୁପର୍ ସ୍ପେଶାଲିଟି ହସ୍ପିଟାଲ, ଭୁବନେଶ୍ୱରର ନୀଳାଦ୍ରି ବିହାରସ୍ଥିତ ବୁଦ୍ଧ ପାର୍କ ନିକଟରେ ଅବସ୍ଥିତ ଉତ୍କଳ ହସ୍ପିଟାଲ ପକ୍ଷରୁ ଆଜି ବିଶ୍ୱ ମଧୁମେହ ଦିବସ-୨୦୨୬ ପାଳନ କରାଯାଇଛି। ଚଳିତ ବର୍ଷର ବିଷୟବସ୍ତୁ ରହିଛି “ମଧୁମେହ ନିୟନ୍ତ୍ରଣ ପାଇଁ ଆଗୁଆ ପଦକ୍ଷେପ” (Early Action on Diabetes)। ମଧୁମେହ ରୋଗର ନିରାକରଣ, ଶୀଘ୍ର ଚିହ୍ନଟ ଏବଂ ଉପଯୁକ୍ତ ଚିକିତ୍ସା ସମ୍ପର୍କରେ ଜନସଚେତନତା ସୃଷ୍ଟି କରିବା ଏହି କାର୍ଯ୍ୟକ୍ରମର ମୁଖ୍ୟ ଉଦ୍ଦେଶ୍ୟ ଥିଲା।
ଏହି ଅବସରରେ ଆଜି ଭୋରରୁ ଏକ ୩ କିଲୋମିଟର ସଚେତନତା ପଦଯାତ୍ରା (ୱାକାଥନ୍) ଆୟୋଜନ କରାଯାଇଥିଲା। ଏଥିରେ ବିଭିନ୍ନ ବୟସ ବର୍ଗର ପ୍ରାୟ ୧୦୦୦ ପୁରୁଷ ଓ ମହିଳା ଉତ୍ସାହର ସହ ଅଂଶଗ୍ରହଣ କରିଥିଲେ। ନିୟମିତ ଶାରୀରିକ ବ୍ୟାୟାମ, ସୁସ୍ଥ ଜୀବନଶୈଳୀ ଏବଂ ସମୟୋଚିତ ସ୍ୱାସ୍ଥ୍ୟ ପରୀକ୍ଷା ମାଧ୍ୟମରେ ମଧୁମେହକୁ ରୋକିବା ଓ ନିୟନ୍ତ୍ରଣ କରିବାର ବାର୍ତ୍ତା ଏହି ପଦଯାତ୍ରା ମାଧ୍ୟମରେ ଦିଆଯାଇଥିଲା।
ଏହି କାର୍ଯ୍ୟକ୍ରମରେ ନାଲ୍କୋର ଜେନେରାଲ ମ୍ୟାନେଜର ମେଡିକାଲ,ଚିଫ୍ ଅଫ ମେଡିକାଲ୍ ସର୍ଭିସେସ ଡକ୍ଟର ସୌରଭ ଦାସ ମୁଖ୍ୟ ଅତିଥି ଭାବେ ଯୋଗଦେଇଥିଲେ। ଉତ୍କଳ ହସ୍ପିଟାଲର ଡକ୍ଟର ପ୍ରାଣବନ୍ଧୁ ସାହୁ, ବରିଷ୍ଠ ପରାମର୍ଶଦାତା, ମେଡିସିନ ଏବଂ ଡାଇବେଟିସ; ଡକ୍ଟର ସୁଧୀର ପଟ୍ଟନାୟକ, ବରିଷ୍ଠ ପରାମର୍ଶଦାତା, ମେଡିସିନ ଏବଂ ଡାଇବେଟିସ; ଡକ୍ଟର ଶୀତିକଣ୍ଠ ନନ୍ଦ, ବରିଷ୍ଠ ପରାମର୍ଶଦାତା, ମେଡିସିନ ଏବଂ ଡାଇବେଟିସ;ଏବଂ ଡକ୍ଟର ମଧୁସ୍ମିତା ସାହୁ, ପରାମର୍ଶଦାତା, ଏଣ୍ଡୋକ୍ରାନୋଲଜୀ ଉପସ୍ଥିତ ଥିଲେ। ଏହା ସହିତ ହସ୍ପିଟାଲର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଶ୍ରୀ ବି.କେ. ସୁବୋଧ ସିଂହ ମଧ୍ୟ ମଞ୍ଚାସୀନ ଥିଲେ।
ଏହି ଅବସରରେ ଅତିଥି ଓ ବିଶେଷଜ୍ଞ ଚିକିତ୍ସକମାନେ ନିଜ ଅଭିଭାଷଣରେ ମଧୁମେହର ବର୍ଦ୍ଧିତ ପ୍ରାଦୁର୍ଭାବ ନେଇ ଉଦ୍ବେଗ ପ୍ରକାଶ କରିବା ସହ ରୋଗର ଶୀଘ୍ର ଚିହ୍ନଟ, ନିୟମିତ ସ୍ୱାସ୍ଥ୍ୟ ପରୀକ୍ଷା, ସନ୍ତୁଳିତ ଖାଦ୍ୟ, ନିୟମିତ ବ୍ୟାୟାମ ଏବଂ ଡାକ୍ତରଙ୍କ ପରାମର୍ଶ ଅନୁସରଣ କରିବାର ଗୁରୁତ୍ୱ ଉପରେ ଆଲୋକପାତ କରିଥିଲେ। ମଧୁମେହର ପ୍ରାରମ୍ଭିକ ଲକ୍ଷଣକୁ ଅଣଦେଖା ନକରି ସମୟୋଚିତ ପଦକ୍ଷେପ ଗ୍ରହଣ କରିବାକୁ ସେମାନେ ଜନସାଧାରଣଙ୍କୁ ଆହ୍ୱାନ ଦେଇଥିଲେ।
କାର୍ଯ୍ୟକ୍ରମରେ ମଧୁମେହ ସମ୍ପର୍କିତ ଏକ ସଚେତନତାମୂଳକ ପ୍ରଶ୍ନୋତ୍ତର ପ୍ରତିଯୋଗିତା ମଧ୍ୟ ଆୟୋଜିତ ହୋଇଥିଲା। ଏଥିରେ କୃତୀ ପ୍ରତିଯୋଗୀମାନଙ୍କୁ ଉପହାର ପ୍ରଦାନ କରାଯାଇଥିଲା। ଏଥିସହିତ ହସ୍ପିଟାଲ ପରିସରରେ ସାଧାରଣ ଜନତାଙ୍କ ପାଇଁ ଏକ ମାଗଣା ରକ୍ତ ଶର୍କରା ପରୀକ୍ଷା (Random Blood Sugar – RBS) ଶିବିର ଆୟୋଜନ କରାଯାଇଥିଲା। ଏହା ମାଧ୍ୟମରେ ଲୋକମାନେ ନିଜ ରକ୍ତରେ ଶର୍କରାର ପରିମାଣ ପରୀକ୍ଷା କରିବାର ସୁଯୋଗ ପାଇଥିଲେ।
ପ୍ରତିବର୍ଷ ନଭେମ୍ବର ୧୪ ତାରିଖରେ ଇନ୍ସୁଲିନ୍ ଆବିଷ୍କାରରେ ଅଗ୍ରଣୀ ଭୂମିକା ଗ୍ରହଣ କରିଥିବା ସାର୍ ଫ୍ରେଡେରିକ୍ ବ୍ୟାଣ୍ଟିଂଙ୍କ ଜନ୍ମବାର୍ଷିକୀ ଉପଲକ୍ଷେ ବିଶ୍ୱ ମଧୁମେହ ଦିବସ ପାଳନ କରାଯାଏ। ସେ ଓ ଚାର୍ଲସ୍ ବେଷ୍ଟ ମିଳିତ ଭାବେ ଇନ୍ସୁଲିନ୍ ଆବିଷ୍କାରରେ ଐତିହାସିକ ଅବଦାନ ରଖିଥିଲେ। ମଧୁମେହ ସମ୍ପର୍କରେ ବିଶ୍ୱବ୍ୟାପୀ ସଚେତନତା ସୃଷ୍ଟି ଏବଂ ଏହି ରୋଗର ମୁକାବିଲା ପାଇଁ ସାମୂହିକ ପ୍ରୟାସକୁ ଉତ୍ସାହିତ କରିବା ଏହି ଦିବସର ମୁଖ୍ୟ ଲକ୍ଷ୍ୟ।
ଏହି ସଚେତନତାମୂଳକ କାର୍ଯ୍ୟକ୍ରମ ମାଧ୍ୟମରେ ଉତ୍କଳ ହସ୍ପିଟାଲ ପ୍ରତିଷେଧକ ସ୍ୱାସ୍ଥ୍ୟସେବା, ଜନସଚେତନତା ଏବଂ ସୁଲଭ ସ୍ୱାସ୍ଥ୍ୟ ପରୀକ୍ଷା ପ୍ରତି ନିଜର ପ୍ରତିବଦ୍ଧତାକୁ ପୁନର୍ବାର ଦୋହରାଇଛି। ମଧୁମେହ ବିରୋଧୀ ଲଢ଼େଇରେ “ଆଗୁଆ ପଦକ୍ଷେପ ହିଁ ସୁସ୍ଥ ଜୀବନର ମୁଖ୍ୟ ଚାବିକାଠି” ବୋଲି ଏହି କାର୍ଯ୍ୟକ୍ରମ ଏକ ଗୁରୁତ୍ୱପୂର୍ଣ୍ଣ ବାର୍ତ୍ତା ପ୍ରଦାନ କରିଛି।
