ଗଜଲ ସନ୍ଧ୍ୟାରେ ପ୍ରତିଷ୍ଠାତାଙ୍କୁ ସ୍ମରଣ କଲା ଭୁବନେଶ୍ୱର ମ୍ୟୁଜିକ୍ ସର୍କଲ୍
ଭୁବନେଶ୍ୱର, ଅକ୍ଟୋବର ୧୪: ରଜତ କୁମାର ମହାପାତ୍ର ଦର୍ଶନ ସମୀକ୍ଷା
ଭୁବନେଶ୍ୱର ମ୍ୟୁଜିକ୍ ସର୍କଲ୍ (ବିଏମ୍ସି) ପକ୍ଷରୁ ଏହାର ପ୍ରତିଷ୍ଠାତା ସର୍ଦ୍ଦାର ସନ୍ତୋକ ସିଂହଙ୍କ ସ୍ମୃତିରେ ଜୟଦେବ ଭବନଠାରେ ଏକ ଗଜଲ ସନ୍ଧ୍ୟା ଆୟୋଜିତ ହୋଇଥିଲା। କାର୍ଯ୍ୟକ୍ରମରେ ବିଶିଷ୍ଟ ଗଜଲ ଶିଳ୍ପୀ ମହମ୍ମଦ ଆବିଦ୍ ଓ ଓଡ଼ିଆ ପ୍ରଚ୍ଛଦପଟ ଗାୟିକା ସ୍ମୃତି ମହାପାତ୍ର ସୁମଧୁର ସଙ୍ଗୀତ ପରିବେଷଣ କରିଥିଲେ।
ସର୍ଦ୍ଦାର ସନ୍ତୋକ ସିଂହଙ୍କ ଜନ୍ମମାସ ଅକ୍ଟୋବରରେ ପ୍ରତିବର୍ଷ ତାଙ୍କ ପ୍ରିୟ ଗଜଲ ଓ ଅର୍ଦ୍ଧଶାସ୍ତ୍ରୀୟ ସଙ୍ଗୀତ ମାଧ୍ୟମରେ ଏହି ସ୍ମୃତି ସନ୍ଧ୍ୟା ଆୟୋଜନ କରାଯାଏ।
ଚାରି ଦଶନ୍ଧିରୁ ଅଧିକ ସମୟ ଧରି ସଙ୍ଗୀତ ସାଧନାରେ ନିୟୋଜିତ ମହମ୍ମଦ ଆବିଦ୍ ଗାୟନ, ସଙ୍ଗୀତ ରଚନା ଓ ଓଡ଼ିଆ ସଙ୍ଗୀତର ପ୍ରଚାରରେ ଉଲ୍ଲେଖନୀୟ ଅବଦାନ ରଖିଛନ୍ତି। ଅନ୍ୟପକ୍ଷରେ, ସ୍ମୃତି ମହାପାତ୍ର ଓଡ଼ିଆ ଚଳଚ୍ଚିତ୍ରରେ ପ୍ରଚ୍ଛଦପଟ ଗାୟନ ସହ ମଞ୍ଚ ପରିବେଷଣ ପାଇଁ ପରିଚିତ।
ଏରାଜ କେ. ରଥ କିବୋର୍ଡ, ପଙ୍କଜ କେ. ରଥ ଅକ୍ଟାପ୍ୟାଡ୍ ଓ ସନ୍ତୋଷ ଭୁଜବଳ ତବଲାରେ ସହଯୋଗ କରିଥିଲେ।
ଭାରତୀୟ ଶାସ୍ତ୍ରୀୟ ସଙ୍ଗୀତ, ନୃତ୍ୟ ଓ ଭକ୍ତି ସଙ୍ଗୀତର ପ୍ରଚାର ତଥା ସଂରକ୍ଷଣ ପାଇଁ କାର୍ଯ୍ୟରତ ବିଏମ୍ସି ଏହି ଆୟୋଜନ ମାଧ୍ୟମରେ ନିଜ ପ୍ରତିଷ୍ଠାତାଙ୍କ ସ୍ମୃତିକୁ ସମ୍ମାନ ଜଣାଇଥିଲା।
