ଆଜିର ଭାଗବତ ବାଣୀ
ଯେଉଁ ମନୁଷ୍ୟ ପଡ଼ିଯିବାବେଳେ,ଗୋଡ଼ ଖସିଯିବାବେଳେ,ଦୁଃଖରେ ପଡ଼ିବା ବେଳେ ଅଥବା ଛିଙ୍କିବା ବେଳେ ଯଦି ବାଧ୍ୟ ହୋଇ ମଧ ଉଚ୍ଚସ୍ବରରେ ଭଗବାନଙ୍କ ନାମ ହେ ଶ୍ରୀହରି, ଶ୍ରୀକୃଷ୍ଣ, ଜଗନ୍ନାଥ – – – କହିଦିଏ ସେ ସକଳ ପାପରୁ ମୁକ୍ତ ହୋଇଯାଏ । ଭଗବାନ ଶ୍ରୀକୃଷ୍ଣ ତ ଅନନ୍ତ; ତେଣୁ କେହି ଶ୍ରୀକୃଷ୍ଣଙ୍କ ନାମ, ଲୀଳା,ଗୁଣ ଆଦି ସଂକୀର୍ତ୍ତନ କଲେ ଅଥବା ତାଙ୍କର ପ୍ରଭାବ, ମହିମା ଆଦି ଶ୍ରବଣ କଲେ,ସେ ଆସି ତା’ହୃଦୟରେ ବିରାଜିତ ହୋଇଯାଆନ୍ତି; ଏବଂ ସୂର୍ଯ୍ୟ ଯେପରି ଅନ୍ଧକାରକୁ ତଥା ବାତ୍ୟା ଯେପରି ବାଦଲକୁ ଦୂର କରିଦିଏ, ଶ୍ରୀକୃଷ୍ଣ ସେହିପରି ତାହାଙ୍କର ନାମ ଶ୍ରବଣ – କୀର୍ତ୍ତନ କରୁଥିବା ମନୁଷ୍ୟର ସକଳ ଦୁଃଖଶୋକ ଦୂର କରିଦିଅନ୍ତି ।
ଭାଗବତ କୃପା
ଭଗବତ୍ କୃପାରୁ ଜୀବକୁ ମନୁଷ୍ୟ ଶରୀର ପ୍ରାପ୍ତ ହୋଇଥାଏ । ଏଠାରେ ସତ୍ ସାଧନ ଦ୍ୱାରା ଇହଲୋକରେ ସୁଖଶାନ୍ତିପ୍ରାପ୍ତି ସହିତ ପରଲୋକରେ ମଧ୍ୟ ପରମ ଗତି ପ୍ରାପ୍ତ ହୋଇଥାଏ । ପରନ୍ତୁ ଏହାର ବିପରୀତ ମାର୍ଗକୁ ଆପଣେଇବା ଦ୍ୱାରା ପଶୁପକ୍ଷୀ , କୀଟପତଙ୍ଗାଦି ଅନେକ ଶରୀର ଧାରଣ କରି ଚଉରାଶି ଲକ୍ଷ ଯୋନି ଭ୍ରମଣ କରିବାକୁ ପଡ଼ିଥାଏ । ତନ୍ମଧ୍ୟରୁ କିଛି ଜୀବର କର୍ମାନୁସାରେ ଦୃଷ୍ଟ ଓ ଅଦୃଶ୍ୟ ଭୂତପ୍ରେତ ଯୋନି ଅନ୍ୟତମ । ଏହି ଶରୀରରେ ଆହାର ନିଦ୍ରା ଆଦି ଶାରୀରିକ ଆବଶ୍ୟକତା ପୂର୍ତ୍ତି କରିବା ନିମିତ୍ତ ପ୍ରବଳ ଇଛା ହୋଇଥାଏ , ମାତ୍ର ପୂର୍ବ ଜନ୍ମର ଅପକର୍ମର ଫଳ ସ୍ୱରୂପ ପଞ୍ଚ ଭୌତିକ ଶରୀର ନ ମିଳିବାରୁ , ସେମାନେ ଅତ୍ୟନ୍ତ ଦୁଃଖୀ ହୋଇ ଚାରିଆଡ଼େ ଘୂରି ବୁଲନ୍ତି । ସେମାନେ ଆତ୍ମୀୟ ସ୍ବଜନ ବର୍ଗଙ୍କୁ ଦେଖିଲେ ବିଭିନ୍ନ ପ୍ରକାର ଉପଦ୍ରବ କରି ଭୟଭୀତ କରାଇଥାନ୍ତି । ସେମାନଙ୍କର ଉଦ୍ଧାର ନିମିତ୍ତ ଶାସ୍ତ୍ରରେ ବିଭିନ୍ନ ଉପାୟର ବର୍ଣ୍ଣନା ରହିଛି । ନଚେତ୍ ସେମାନଙ୍କର ଆୟୁ ସମାପ୍ତ ହେଲେ ଉକ୍ତ ଯୋନିରୁ ମୁକ୍ତ ହୋଇଥାନ୍ତି । ଆଧୁନିକ ଶିକ୍ଷିତ ସମାଜ ବିଜ୍ଞାନର ଦୁହାଇ ଦେଇ ଭୂତପ୍ରେତ ଇତ୍ୟାଦି କେବଳ ମିଥ୍ୟା ଭ୍ରମ ବୋଲି କହନ୍ତି I କିନ୍ତୁ ବହୁତ ରୋଗୀଙ୍କୁ ଆଧୁନିକ ଡାକ୍ତର ମାନେ ରୋଗ ଚିହ୍ନି ନ ପାରି ମାନସିକ ରୋଗୀ ବୋଲି କହିଥାନ୍ତି । ନିକଟ ଅତୀତରେ କିଛି ଏମିତି ରୋଗୀ ଡାକ୍ତରଙ୍କ ଠାରୁ ବହୁବାର ଚିକିତ୍ସା ହେଲା ପରେ ବିଫଳ ହୋଇ ଆମ ଆଶ୍ରମରେ ପହଞ୍ଚିଛନ୍ତି । ଆଶ୍ରମରେ ଚାଲିଥିବା ଦୈନିକ ଯଜ୍ଞରେ ତାଙ୍କୁ ଯୋଗ ଦାନ କରିବାକୁ କହି କିଛି ଯଜ୍ଞ ବିଭୂତି ଲଗାଇବାର କିଛି ଦିନ ପରେ ସେମାନେ ସୁସ୍ଥ ଅନୁଭବ କରିଛନ୍ତି । କିଛିଦିନ ତଳେ ଅନୁଗୁଳ ନାଲକୋରେ ଚାକିରି କରିଥିବା ଜଣେ ଭାଇ ତାଙ୍କ ଘରେ ଏଭଳି ଅନେକ ଭୟଙ୍କର ଘଟଣାରେ ଭୟଭୀତ ଥିଲେ । ଏପରିକି ହଠାତ୍ ତାଙ୍କ କବାଟରେ ରାତିରେ କିଏ ବାଡ଼େଇବା ଶୁଣାଯାଏ I କିନ୍ତୁ ଖୋଲିଲା ବେଳକୁ କିଛି ଦେଖାଯାଏ ନାହିଁ । ଘର ଭିତରେ କିଛି ଜିନିଷ ଖସିପଡ଼ିଲା ଭଳି ଜଣା ପଡେ ; ମାତ୍ର କିଛି ଜଣା ପଡେ ନାହି । ଏଭଳି ଅନେକ କଥା । ଆମେ ତାଙ୍କୁ ଗୀତା ପାଠ, ବିଷ୍ଣୁ ସହସ୍ରନାମ ପାଠ , ହନୁ ମାନ ଚାଳିଶା ପାଠ ଓ ହୋମ କରିବା ପାଇଁ କହିଥିଲୁ । ଏପରି କରିବା ଦ୍ୱାରା ଏବେ ସବୁ ଠିକ୍ ଠାକ୍ ଅଛି । ବହୁ ଦିନ ତଳର କଥା , ଥରେ ଜଣେ ମହାତ୍ମା ଋଷିକେଶରେ ଆମକୁ ଏଭଳି ସମସ୍ୟାର ସମାଧାନ ପାଇଁ ଶ୍ରୀମଦ୍ ଭଗବତ୍ ଗୀତାର ଏକାଦଶ ଅଧ୍ୟାୟର ଛତିଶ ଶ୍ଳୋକ ପାଠ ସହିତ କାନ୍ଥରେ ଲେଖିବା ପାଇଁ କହିଥିଲେ । ଏହାର ପ୍ରୟୋଗ କରି ଅନେକ ଲୋକଙ୍କର ଅନେକ ସମସ୍ୟାର ସମାଧାନ ହୋଇଛି । ଏଠାରେ ଆପଣମାନେ ଜାଣିବା ପାଇଁ ସେଇ ଶ୍ଳୋକଟି ଉଲ୍ଲେଖ କରୁଛି, “ସ୍ଥାନେ ହୃଷୀକେଶ ତବ ପ୍ରକୀର୍ତ୍ତ୍ୟା,ଜଗତ୍ ପ୍ରହୃଷ୍ୟତ୍ୟନୁରଜ୍ୟତେ ଚ଼ । ରକ୍ଷାଂସି ଭୀତାନି ଦିଶୋ ଦ୍ରବନ୍ତି ,ସର୍ବେ ନମସ୍ୟନ୍ତି ଚ ସିଦ୍ଧସଂଘାଃ । ଗୀତା ସଂପୂର୍ଣ୍ଣ ପାଠ କରି ପାରିଲେ ତ ଭଲ , ନଚେତ୍ ଏହି ଶ୍ଳୋକର ପାଠ ଓ ହୋମକଲେ ଉପଦ୍ରବୀ ଆତ୍ମାଠାରୁ ନିଶ୍ଚିତ ରକ୍ଷା ପାଇପାରିବେ । ଭଗବାନଙ୍କର ମୁଖ ନିସୃତ ବାଣୀ ଗୀତା, ବେଦ ମନ୍ତ୍ରଠାରୁ କୌଣସି ଗୁଣରେ କମ ନୁହଁନ୍ତି । ପ୍ରତ୍ୟହ ଘରେ ଗୀତା ପାଠକଲେ , ଆଧିଭୌତିକ , ଆଧ୍ୟାତ୍ମିକ , ଆଧିଦୈବିକ ,ତ୍ରିତାପରୁ ମୁକ୍ତି ମିଳିଥାଏ । ଜୟ ଜଗନ୍ନାଥ !
ସ୍ଵାମୀ ଶ୍ରୀ ସଚ୍ଚିଦାନନ୍ଦ ସରସ୍ବତୀ ।
ବ୍ରହ୍ମଚାରୀ ଆଶ୍ରମ, ବ୍ରାହ୍ମଣୀ ଦେଈ, କଣିହାଁ, ଅନୁଗୁଳ ।
ଶ୍ରୀ ଜଗନ୍ନାଥ ଶରଣଂ