ପ୍ରେସ୍ ବିଜ୍ଞପ୍ତି
ହିନ୍ଦୋଳ ରାଜମୋହନପୁରରେ ହାତୀ ମୃତ୍ୟୁ ଘଟଣା: ୩ ଜଣ ଅଟକ, ତଦନ୍ତ ଜାରି
ହିନ୍ଦୋଳ, ଜୁନ୍ ୧: (ଦର୍ଶନ ସମୀକ୍ଷା)
ହିନ୍ଦୋଳ ଉପଖଣ୍ଡର ରାଜମୋହନପୁର ଅଞ୍ଚଳରେ ଥିବା ଏକ ଘରୋଇ ଫାର୍ମ ହାଉସରେ ଏକ ବଣୁଆ ହାତୀର ବିଦ୍ୟୁତ୍ ସଂସ୍ପର୍ଶରେ ମୃତ୍ୟୁ ଘଟଣାକୁ ନେଇ ପ୍ରଶାସନ ଓ ବନ ବିଭାଗ ପକ୍ଷରୁ ତ୍ୱରିତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।
ସୋମବାର ବନ ବିଭାଗ ଏବଂ ସ୍ଥାନୀୟ ପ୍ରଶାସନର ଅଧିକାରୀମାନେ ଘଟଣାସ୍ଥଳରେ ପହଞ୍ଚି ହାତୀର ମୃତଦେହ ଖୋଳି ବାହାର କରିବା ସହ ଆବଶ୍ୟକ ତଦନ୍ତ ପ୍ରକ୍ରିୟା ଆରମ୍ଭ କରିଛନ୍ତି।
ପ୍ରାଥମିକ ତଦନ୍ତରୁ ହାତୀଟି ଏକ ବେଆଇନ ବିଦ୍ୟୁତୀକରଣ କରାଯାଇଥିବା ବାଡ଼ର ସଂସ୍ପର୍ଶରେ ଆସି ପ୍ରାଣ ହରାଇଥିବା ସନ୍ଦେହ କରାଯାଉଛି। ଏହି ଘଟଣାରେ ସମ୍ପୃକ୍ତ ଥିବା ଅଭିଯୋଗରେ ଫାର୍ମର ମାଲିକ, ଜଣେ ଜେସିବି ଅପରେଟର ଏବଂ ଜଣେ ସୁରକ୍ଷା କର୍ମଚାରୀଙ୍କୁ ଅଟକ ରଖାଯାଇଛି।
ସମ୍ପୃକ୍ତ ଫାର୍ମକୁ ପ୍ରଶାସନ ପକ୍ଷରୁ ଜବତ କରାଯାଇଥିବା ବେଳେ ଘଟଣାର ଅଧିକ ତଦନ୍ତ ଚାଲିଛି। ହାତୀର ଶବ ବ୍ୟବଚ୍ଛେଦ ରିପୋର୍ଟ ଏବଂ ତଦନ୍ତର ଚୂଡ଼ାନ୍ତ ତଥ୍ୟ ଆଧାରରେ ପରବର୍ତ୍ତୀ ଆଇନଗତ ପଦକ୍ଷେପ ଗ୍ରହଣ କରାଯିବ।
ଘଟଣା ନେଇ ଦୁଃଖ ପ୍ରକାଶ କରି ଢେଙ୍କାନାଳ ବନଖଣ୍ଡ ଅଧିକାରୀ (ଡିଏଫଓ) ଶ୍ରୀ ଲଳିତ କୁମାର ପାତ୍ର ସାଧାରଣ ଲୋକଙ୍କୁ କ୍ଷେତ ସୁରକ୍ଷା ନାମରେ ବେଆଇନ ବିଦ୍ୟୁତ୍ ବାଡ଼ କିମ୍ବା ବିଦ୍ୟୁତୀକରଣ କରାଯାଇଥିବା ସୋଲାର ବାଡ଼ ବ୍ୟବହାର ନ କରିବାକୁ ଅନୁରୋଧ କରିଛନ୍ତି।
ସେ କହିଛନ୍ତି ଯେ, କୌଣସି ଅଞ୍ଚଳରେ ହାତୀ ଥିବା ସମ୍ପର୍କରେ ସୂଚନା ମିଳିଲେ କିମ୍ବା କେହି ବେଆଇନ ବିଦ୍ୟୁତ୍ ବାଡ଼ ବ୍ୟବହାର କରୁଥିବା ଜଣାପଡ଼ିଲେ ତୁରନ୍ତ ନିକଟସ୍ଥ ବନ ବିଭାଗ କାର୍ଯ୍ୟାଳୟକୁ ଅବଗତ କରାଇବାକୁ। ଏଭଳି ଅଘଟଣକୁ ରୋକିବା ଏବଂ ବନ୍ୟଜନ୍ତୁ ସୁରକ୍ଷା ପାଇଁ ସାଧାରଣ ଜନତାଙ୍କ ସହଯୋଗ ଅତ୍ୟନ୍ତ ଆବଶ୍ୟକ ବୋଲି ସେ ମତ ପ୍ରକାଶ କରିଛନ୍ତି।
ବନ ବିଭାଗ ପକ୍ଷରୁ ବନ୍ୟଜନ୍ତୁ ସୁରକ୍ଷା ଆଇନ ଉଲ୍ଲଙ୍ଘନ କରୁଥିବା ବ୍ୟକ୍ତିଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଜାରି ରହିବ ବୋଲି କୁହାଯାଇଛି।
Leave a Reply