ବଞ୍ଚିବକି ପର ପିଢ଼ି?
ପଚାରୁଛି କୁହ ବିଷମ ସମୟେ
ତୁମ ଭବିଷ୍ୟତ ପିଢ଼ି।
ପ୍ରକୃତି ଦେହରୁ ଆତ୍ମାକୁ ତାହାର
କାହିଁକି ନେଉଛ କାଢି?
ଖଣି,ପାଣି, ନଦୀ, ପାହାଡ଼ ପର୍ବତ
ସମୁଦ୍ର ସମ୍ପଦ ଯାହା।
ଲୁଣ୍ଠନ କରୁଛ ସଞ୍ଚିତ ସମ୍ପଦ
ମିଳିବକି ଆଉ ତାହା?
ପଶୁ ପକ୍ଷୀ ସହ ଜଳ ଜୀବ ଯେତେ
ହୁଅନ୍ତି ତୁମ ଶିକାର।
ସୌର ଶକ୍ତି କିବା ପବନ ଶକ୍ତିକୁ
କର କାହିଁ ନାରଖାର।।
ଜଳବାୟୁ ସବୁ ଦୂଷିତ କରୁଛ
ଜଙ୍ଗଲ ନେଉଛ ଲୁଟି।
ସହରୀକରଣ ଶିଳ୍ପାୟନ ପାଇଁ
ବୃକ୍ଷଲତା ଦିଅ କାଟି।।
ସ୍ଵଚ୍ଛ ଅନ୍ତରୀକ୍ଷ ଦୂଷିତ କଲଣି
ଉପଗ୍ରହ କେତେ ଛାଡି।
କୃତ୍ରିମ ଗ୍ରହର ଆବର୍ଜନା ବସ୍ତୁ
ଦେଉଛ ନେଇ ଅଜାଡ଼ି।।
ଗର୍ଭସ୍ଥ ଶିଶୁଟି ପଚାରୁଛି କୁହ
ବଞ୍ଚି ପାରିବକି ସିଏ ?
ତୁମ ସମୟର ପରିବେଶ ଯାହା
ଫେରାଇବ କୁହ କିଏ?
ପର ପିଢ଼ି ତୁମ ପଚାରୁଛି କୁହ
ତୁମେ କିବା ଶେଷ ପିଢି।
ଆସିଥିଲ ତୁମେ ହସି ଖେଳି ଯିବ
ବିଷ ବଳୟକୁ ଛାଡି?
ହାତ ଗୋଡ ଆଖି କାନ ନାକ ପାଟି
ଶରୀରରୁ ନେଲେ କାଢି।
ଜନ୍ମ ହୋଇ ଏଠି ତୁମ ପର ପିଢ଼ି
ପାରିବକି ଏଠି ବଢି?
ସୃଷ୍ଟି ସମୃଦ୍ଧି ବା ଧ୍ଵଂସ ପ୍ରଳୟରୁ
ଗୋଟିଏକୁ ବାଛି ନିଅ।
ଶେଷ ପିଢି ହୋଇ ପର ପିଢି ପାଇଁ
ମନ ଆଉ ନବଳାଅ।।
ସଞ୍ଜୟ ରଥ ଭୁବନେଶ୍ବର
Leave a Reply