ଟ୍ରମ୍ପ୍ ଶୁଳ୍କରେ ଚିଙ୍ଗୁଡ଼ି ଚାଷୀ ବରବାଦ୍, ମୂଲ୍ୟ ୨୦% କମାଇଲେ ରପ୍ତାନିକାରୀ
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ଭାରତ ଉପରେ ଉଚ୍ଚ ଶୁଳ୍କ ବା ଟାରଇଫ୍ ଲାଗୁ କରିବା ପରେ ଦୁଇ ଦେଶ ମଧ୍ୟରେ ସମ୍ପର୍କରେ ବଡ଼ ଫାଟ ସୃଷ୍ଟି ହୋଇଛି। ହେଲେ ଏବେ ଟ୍ରମ୍ପ୍ଙ୍କ ଏହି ଶୁଳ୍କର ପ୍ରଭାବ ଭାରତୀୟ ଚିଙ୍ଗୁଡ଼ି ଚାଷୀଙ୍କ ଉପରେ ପଡିଛି। କାରଣ ଭାରତୀୟ ଚିଙ୍ଗୁଡ଼ି ଚାଷୀ ଏବଂ ରପ୍ତାନିକାରୀଙ୍କ ପାଇଁ ଆମେରିକା ସବୁଠାରୁ ବଡ଼ ବଜାର। ଏହାର କ୍ରେତାମାନଙ୍କ ମଧ୍ୟରେ ୱାଲମାର୍ଟ ଏବଂ କ୍ରୋଗର ଭଳି ଆମେରିକୀୟ ସୁପରମାର୍କେଟ୍ ଚେନ୍ ରହିଛି। ଗତ ବର୍ଷ, ଭାରତରୁ ବିଶ୍ୱକୁ ମୋଟ ସାମୁଦ୍ରିକ ଖାଦ୍ୟ ରପ୍ତାନି ୭.୪ ବିଲିୟନ ଡଲାର ଥିଲା। ତେବେ କେବଳ ଚିଙ୍ଗୁଡ଼ି ରପ୍ତାନି ଏହାର ୪୦% ଥିଲା। କିନ୍ତୁ ବର୍ତ୍ତମାନ ଟ୍ରମ୍ପ୍ ଶୁଳ୍କର ପ୍ରଭାବରେ ଶିଳ୍ପ ସମସ୍ୟାରେ ପଡ଼ିଛି। ଆମେରିକା ରାଷ୍ଟ୍ରପତି ପୂର୍ବରୁ ଭାରତରୁ ଆମଦାନି ଉପରେ ୨୫% ଶୁଳ୍କ ଲାଗୁ କରିସାରିଛନ୍ତି।
ଏହା ବିଶ୍ବର ପ୍ରମୁଖ ଅର୍ଥନୀତି ମଧ୍ୟରେ ସର୍ବାଧିକ। ଏହ ବ୍ୟତୀତ ରୁଷରୁ ତେଲ କିଣିବା ପାଇଁ ଭାରତ ଉପରେ ଅଗଷ୍ଟ ୨୭ରୁ ଅତିରିକ୍ତ ୨୫% ଶୁଳ୍କ ଲାଗୁ ହେବାକୁ ଯାଉଛି। ତେବେ ଭାରତ ତୁଳନାରେ ଇକ୍ୱେଡର ଉପରେ ଆମେରିକା ଖୁବ୍ କମ୍ ଅର୍ଥାତ୍ ୧୫% ଶୁଳ୍କ ଲଗାଇଛି। ତେଣୁ ଭାରତ ପ୍ରତି ଏବେ ଇକ୍ବେଡର ଆଡୁ ବିପଦ ରହିଛି। କାରଣ ଇକ୍ବେଡର ହେଉଛି ଆମେରିକାକୁ ଚିଙ୍ଗୁଡ଼ି ରପ୍ତାନି କରିବାରେ ଭାରତର ମୁଖ୍ୟ ପ୍ରତିଦ୍ୱନ୍ଦ୍ୱୀ। ଏବେ ଟ୍ରମ୍ପଙ୍କ ୫୦% ଶୁଳ୍କ ଧମକ ଯୋଗୁଁ ଅନେକ ଚାଷୀ ଅନ୍ୟ କାମ କରିବାକୁ ଚିନ୍ତା କରୁଛନ୍ତି। ଏଥିରେ ଓଡ଼ିଶାର ଚୁଙ୍ଗୁଡି ଚାଷୀ ମଧ୍ୟ ରହିଛନ୍ତି। ଭାରତର ଅଧିକାଂଶ ଚିଙ୍ଗୁଡ଼ି ଆନ୍ଧ୍ରପ୍ରଦେଶରୁ ଆମେରିକା ପଠାଯାଏ। ସେଠାକାର ଚାଷୀମାନେ ଲୁଣାପାଣି ପୋଖରୀରେ ଭଲ ଗୁଣବତ୍ତାର ଚିଙ୍ଗୁଡ଼ି ଚାଷ କରିବା ପାଇଁ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରିଥାନ୍ତି। ଏବେ ସେମାନେ ବଡ଼ କ୍ଷତି ସହୁଛନ୍ତି। କାରଣ ହେଉଛି ଭାରତୀୟ ରପ୍ତାନିକାରୀମାନେ ଶୁଳ୍କ ଆଘାତ ପରେ ଚାଷୀମାନଙ୍କୁ ଦିଆଯାଉଥିବା ଚିଙ୍ଗୁଡି ମୂଲ୍ୟରେ ପ୍ରାୟ ୨୦% ହ୍ରାସ କରିଛନ୍ତି। ଏହା ଚାଷୀମାନଙ୍କର ସମସ୍ତ ଲାଭକୁ ନଷ୍ଟ କରିଦେଉଛି।
ସୂଚନାଯୋଗ୍ୟ ଯେ, ଆନ୍ଧ୍ରପ୍ରଦେଶର ପ୍ରାୟ ୩ ଲକ୍ଷ ଚାଷୀ ଚିଙ୍ଗୁଡ଼ି ଚାଷରେ ନିୟୋଜିତ ଅଛନ୍ତି। ସେମାନେ ଆମେରିକାକୁ ସାମଗ୍ରୀ ପଠାଉଥିବା ଡଜନ ଡଜନ ରପ୍ତାନିକାରୀଙ୍କୁ ଉତ୍ପାଦ ବିକ୍ରି କରିଥାନ୍ତି। ଭାରତୀୟ ସାମୁଦ୍ରିକ ଖାଦ୍ୟ ରପ୍ତାନିକାରୀ ସଂଘର ମୁଖ୍ୟ ପବନ କୁମାରଙ୍କ ଅନୁଯାୟୀ, ଗତ କିଛି ସପ୍ତାହରେ ଆମେରିକୀୟ ଗ୍ରାହକଙ୍କଠାରୁ ଅର୍ଡର ବନ୍ଦ ହୋଇଯାଇଛି। କ୍ରେତାମାନେ ଶୁଳ୍କ ବହନ କରିବାକୁ ଇଚ୍ଛୁକ ନୁହଁନ୍ତି। ରପ୍ତାନିକାରୀମାନେ ମଧ୍ୟ ଏହା କରିପାରିବେ ନାହିଁ। ତେଣୁ, ସେମାନଙ୍କୁ ଚାଷୀମାନଙ୍କୁ ଦିଆଯାଉଥିବା ମୂଲ୍ୟ ହ୍ରାସ କରିବାକୁ ପଡିବ। କୁମାର କହିଛନ୍ତି ଯେ ଯଦିଓ ଭାରତ ଚୀନ୍, ଜାପାନ ଏବଂ ବ୍ରିଟେନ୍ ଭଳି ଅନ୍ୟ ଦେଶଗୁଡ଼ିକୁ ମଧ୍ୟ ଚିଙ୍ଗୁଡ଼ି ବିକ୍ରୟ କରେ। ଏହା ସମ୍ଭବ ଯେ ସେଠାରେ ବିକ୍ରି ବିସ୍ତାର କରିବା ଏବଂ ନୂତନ ବଜାରକୁ ବିବିଧ କରିବା ପାଇଁ ପ୍ରୟାସ କରାଯିବ। କିନ୍ତୁ, ଏହା ରାତାରାତି ସମ୍ଭବ ହେବନାହିଁ।
Leave a Reply