ଦିଲ୍ଲୀରେ ବଢୁଥିବା ଅପରାଧକୁ ନେଇ ଦିଲ୍ଲୀର ପୂର୍ବତନ ସିଏମ ଅରବିନ୍ଦ କେଜ୍ରିୱାଲ କେନ୍ଦ୍ର ସରକାର ଏବଂ ଅମିତ ଶାହଙ୍କୁ ଟାର୍ଗେଟ କରିଛନ୍ତି। ସେ କହିଛନ୍ତି ଦିଲ୍ଲୀରେ ଆଇନ ଶୃଙ୍ଖଳା ବିଗିଡ଼ିଯାଇଛି। ଲୋକମାନେ ନିଜକୁ ଅସୁରକ୍ଷିତ ମନେ କରୁଛନ୍ତି…
ଆଇନ ଏବଂ ଶୃଙ୍ଖଳା ଅମିତ ଶାହଙ୍କ ଅଧୀନରେ ଆସେ, ତେଣୁ ତୁରନ୍ତ ପ୍ରଭାବଶାଳୀ ପଦକ୍ଷେପ ଗ୍ରହଣ କରିବାର ଆବଶ୍ୟକତା ଅଛି। ଗତ ୧୪ ଘଣ୍ଟା ମଧ୍ୟରେ ରାଜଧାନୀରେ ତିନୋଟି ଅପରାଧ ଘଟିଛି। ବନ୍ଧୁକମୁନରେ ବଡ଼ ବ୍ୟବସାୟୀଙ୍କଠାରୁ ବଟି ଆଦାୟ କରାଯାଇଛି। ଏଥିରେ ହିମାଂଶୁ ଭାଉ ଏବଂ ଗୋଲ୍ଡି ବରାର ଭଳି କୁଖ୍ୟାତ ଗ୍ୟାଙ୍ଗଷ୍ଟରଙ୍କ ନାମ ସାମ୍ନାକୁ ଆସିଛି।
ଦିଲ୍ଲୀରେ ଗତ କିଛି ଦିନ ମଧ୍ୟରେ ଚୋରାଚାଲାଣ ଘଟଣା ସାଧାରଣ ହେବାରେ ଲାଗିଛି। ଶୁକ୍ରବାର ରାତିରେ ନାରାୟଣର ସେକେଣ୍ଡ ହ୍ୟାଣ୍ଡ କାର ଶୋ’ରୁମରେ ୨୦ ରାଉଣ୍ଡ ଗୁଳିମାଡ଼ କରାଯାଇଥିଲା। ତେବେ ଏହି ଘଟଣାରେ କେହି ମୃତାହତ ହୋଇ ନାହାନ୍ତି। ତେବେ ଶୋ’ରୁମ୍ର କାରଗୁଡିକ ଯଥେଷ୍ଟ କ୍ଷତିଗ୍ରସ୍ତ ହୋଇଛି।
ଗୁଳି ଚଳାଇଥିବା ଦୁଷ୍କର୍ମକାରୀମାନେ ଗ୍ୟାଙ୍ଗଷ୍ଟର ହିମାଂଶୁ ଭାଉଙ୍କ ନାମରେ ଭୟ ଦେଖାଇ ୫ କୋଟି ଟଙ୍କା ବଟି ମାଗିଥିଲେ। ସେହିଦିନ ରାତିରେ ବାଇକ୍ ଆରୋହୀମାନେ ଜଣେ ସୁନା ବ୍ୟବସାୟୀଙ୍କଠାରୁ ୩.୫ କୋଟି ଟଙ୍କା ମୂଲ୍ୟର ୪ କିଲୋଗ୍ରାମ ସୁନା ଚୋରି କରିଥିଲେ।
ଅନ୍ୟାନ୍ୟ ଘଟଣାରେ ଶନିବାର ନାଙ୍ଗଲୋଇ ଏବଂ ମହିଲପାଲପୁରରେ ଅବସ୍ଥିତ ମିଠା ଦୋକାନ ଓ ହୋଟେଲ ମାଲିକଙ୍କ ପ୍ରତିଷ୍ଠାନ ସମ୍ମୁଖରେ ଗୁଳିମାଡ଼ ହୋଇଥିଲା। ଗୋଟିଏ ମାମଲାରେ ପ୍ରଚାର କାଗଜ ଫିଙ୍ଗି ବଟି ମଗା ଯାଇଥିବାବେଳେ ଅନ୍ୟ ମାମଲାରେ କେବଳ ଗୁଳିମାଡ଼ କରାଯାଇଥିଲା।