ସ୍ବାସ୍ଥ୍ୟ କ୍ଷେତ୍ରରେ ବିରାଟ ସଫଳତା: ଶିଶୁ ମୃତ୍ୟୁହାର ହ୍ରାସରେ ଓଡିଶା ସବୁଠାରୁ ଆଗରେ
ପ୍ରଦୀପ କୁମାର ପଣ୍ଡା
ଦର୍ଶନ ସମୀକ୍ଷା, ଭୁବନେଶ୍ୱର
ସ୍ବାସ୍ଥ୍ୟ କ୍ଷେତ୍ରରେ ଓଡିଶାକୁ ବଡ ସଫଳତା । ରାଜ୍ୟରେ ଶିଶୁ ମୃତ୍ୟୁ ହାର ପ୍ରତି ଏକ ହଜାରରେ ୩୬କୁ କମିଲା । ୨୦୦୫ ରୁ ୨୦୨୦ ମଧ୍ୟରେ ଶିଶୁ ମୃତ୍ୟୁ ହାରରେ ୩୯ ପଏଣ୍ଟ ହ୍ରାସ । ସାରା ଦେଶରେ ଏହା ସର୍ବାଧିକ । ସ୍ୱାସ୍ଥ୍ୟ ବିଭାଗ, ମହିଳା ଓ ଶିଶୁ କଲ୍ୟାଣ , ମିଶନ ଶକ୍ତି ବିଭାଗ ଓ ଟିମ୍ ଓଡିଶାକୁ ଅଭିନନ୍ଦନ ଜଣାଇଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ବିକାଶରେ ବିଭିନ୍ନ କ୍ଷେତ୍ରରେ ଓଡିଶା କ୍ରମାଗତଭାବେ ସଫଳତା ହାସଲ କରି ଅନ୍ୟ ରାଜ୍ୟ ମାନଙ୍କ ପାଇଁ ଆଦର୍ଶ ସୃଷ୍ଟି କରିଛି । ଆଜି ମୋ ସରକାରର ସମୀକ୍ଷା ବୈଠକରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି ଯେ, ଓଡିଶା ଶିଶୁ ମୃତ୍ୟୁହାରରେ ୩୯ ପଏଣ୍ଟ ହ୍ରାସ କରିବାରେ ସଫଳ ହୋଇଛି । ୨୦୦୫ରୁ ୨୦୨୦ ମଧ୍ୟରେ ଏହି ସଫଳତା ମିଳିଛି । ଏହା ସାରା ଦେଶରେ ଏହି ସମୟ ମଧ୍ୟରେ ସର୍ବାଧିକ ହ୍ରାସ । ବର୍ତ୍ତମାନ ରାଜ୍ୟର ଶିଶୁ ମୃତ୍ୟୁ ହାର ପ୍ରତି ଏକ ହଜାରରେ ୩୬କୁ କମିଯାଇଛି ।
ଏଥିପାଇଁ ମୁଖ୍ୟମନ୍ତ୍ରୀ ସ୍ବାସ୍ଥ୍ୟ ବିଭାଗ,ମହିଳା ଓ ଶିଶୁ କଲ୍ୟାଣ ବିଭାଗ,ମିଶନ ଶକ୍ତି ବିଭାଗ ଏବଂ ଟିମ୍ ଓଡିଶାକୁ ଅଭିନନ୍ଦନ ଜଣାଇଥିଲେ ଏବଂ ଓଡିଶାର ବିକାଶ ଯାତ୍ରାରେ ସମସ୍ତେ ସାମିଲ ହୋଇ ଓଡିଶା ପାଇଁ ନୂଆ ନୂଆ ସଫଳତା ହାସଲ କରିବା ପାଇଁ ପରାମର୍ଶ ଦେଇଥିଲେ।
ସେହିଭଳି ଜାତୀୟ ପରିବାର ସ୍ବାସ୍ଥ୍ୟ ସର୍ବେକ୍ଷଣ- ୫ରେ ଓଡିଶାକୁ ସଫଳତା ମିଳିଛି। ପ୍ରକାଶ ପାଇଥିବା ଫଳାଫଳରେ ପ୍ରମୁଖ ଖାଦ୍ୟ-ପୋଷଣ ସୂଚକାଙ୍କରେ ରାଜ୍ୟର ଉଲ୍ଲେଖନୀୟ ଅଗ୍ରଗତି ପରିଲକ୍ଷିତ ହୋଇଛି। ରାଜ୍ୟରେ ୯୦.୭୫ ପ୍ରତିଶତ ଶିଶୁଙ୍କର ସଂପୂର୍ଣ୍ଣ ଟିକାକରଣ କରାଯାଇଛି ।
ଉପଯୁକ୍ତ ପୋଷଣ ଅଭାବରୁ ବୟସାନୁପାତରେ ଉଚ୍ଚତା କମ୍ ରହୁଥିବା ପିଲାଙ୍କ ସଂଖ୍ୟା ଗତ ଫଳାଫଳ ଅନୁସାରେ ଚଳିତ ଥର ୩.୧ ପ୍ରତିଶତ କମିଥିବା ବେଳେ ଉପଯୁକ୍ତ ଚିକିତ୍ସା ଅଭାବରୁ ମୃତ୍ୟୁ ସମ୍ଭାବନା ଥିବା ଶିଶୁଙ୍କ ପ୍ରତିଶତ ୨.୩କୁ ହ୍ରାସ ପାଇଛି ଏବଂ କମ୍ ଓଜନ ଶିଶୁଙ୍କ ସଂଖ୍ୟା ୪.୭ ପ୍ରତିଶତ କମିଥିବା ଜାତୀୟ ପରିବାର ସ୍ବାସ୍ଥ୍ୟ ସର୍ବେକ୍ଷଣ- ୫ ରିପୋର୍ଟରୁ ଜଣାପଡିଛି। ଅନ୍ୟ ପୋଷକ ସୂଚକ ଯଥା ଶିଶୁ ଜନ୍ମପରେ ପ୍ରଥମ ସ୍ତନ୍ୟପାନ କରିଥିବା ଶିଶୁଙ୍କ ସୂଚକାଙ୍କ ଜାତୀୟ ପରିବାର ସ୍ବାସ୍ଥ୍ୟ ସର୍ବେକ୍ଷଣ ୪ରେ ୬୫.୬ ଥିବାବେଳେ ସର୍ବେକ୍ଷଣ-୫ରେ ଏହା ୭୨.୯ ପ୍ରତିଶତକୁ ବୃଦ୍ଧି ପାଇଛି ଏବଂ ପରିପୂରକ ପୋଷକ ୫୪.୯ ପ୍ରତିଶତରୁ ୬୭ ପ୍ରତିଶତକୁ ବୃଦ୍ଧି ପାଇଛି। ଆବଶ୍ୟକ ପରିମାଣରେ ଖାଦ୍ୟ ଗ୍ରହଣ କରୁଥିବା ୬ରୁ ୨୩ ମାସର ଶିଶୁଙ୍କ ପ୍ରତିଶତରେ ଉଲ୍ଲେଖନୀୟ ଉନ୍ନତି ଘଟିଛି ବୋଲି ସର୍ବେକ୍ଷଣ ରିପୋର୍ଟରୁ ଜଣାପଡିଛି।
ତେବେ ରାଜ୍ୟରେ ସମସ୍ତ ସ୍ବାସ୍ଥ୍ୟ ସେବା କ୍ଷେତ୍ରରେ ଶିଶୁ ସ୍ବାସ୍ଥ୍ୟ ମାତୃ ସ୍ୱାସ୍ଥ୍ୟ ସବୁଥିରେ ରାଜ୍ୟ ଉଲ୍ଲେଖନୀୟ ସଫଳତା ମିଳିଛି,“କହିଛନ୍ତି ପରିବାର କଲ୍ୟାଣ ନିର୍ଦ୍ଦେଶକ ବିଜୟ ପାଣିଗ୍ରାହୀ।
ପୂର୍ବରୁ ହଜାର ଶିଶୁଙ୍କ ମଧରେ ୩୧ ଜଣ ଶିଶୁ ମୃତ୍ୟୁବରଣ କରୁଥିଲେ। ବର୍ତ୍ତମାନ ଏହା କମି ୨୭ରେ ପହଞ୍ଚିଛି। ବର୍ଷକର କମ ଶିଶୁ ଆଇ ଏମ ଆର କୁହାଯାଉଛି ତାହା ୪୦ ଥିଲା ବର୍ତ୍ତମାନ ୩୬କୁ ଆସିଛି । ୫ ବର୍ଷରୁ କମ ଶିଶୁ ୪୪ଥିଲା ବର୍ତ୍ତମାନ ଏହା ୪୧କୁ ଖସି ଆସିଛି। ତେଣୁ ମୃତ୍ୟୁ ହାର ଟୀକାକରଣରେ ଓଡିଶା ଅଗ୍ରଗତି କରିଛି। ରାଜ୍ୟରେ ଗର୍ଭବତୀ ମହିଳା ପଞ୍ଜିକରଣ କ୍ଷେତ୍ରରେ ଅଧିକ ଉର୍ଣ୍ଣିତି ଘଟିଛି । ପୂର୍ବରୁ ୬୪ ପ୍ରତିଶତ ଥିଲା ବର୍ତ୍ତମାନ ଏହା ୭୪କୁ ବୃଦ୍ଧି ପାଇଛି। ଗର୍ଭବତୀ ଥିବା ମହିଳାମାନେ ୪ଟି ପରୀକ୍ଷା କରିଥାନ୍ତି। ସେ କ୍ଷେତ୍ରରେ ମଧ୍ୟ ୬୧ ପ୍ରତିଶତ ଥିଲା ବର୍ତ୍ତମାନ ଏହା ୭୮ ପ୍ରତିଶତକୁ ବୃଦ୍ଧି ପାଇଛି । ସ୍ବାସ୍ଥ୍ୟ ବିଶେଷଜ୍ଞବି ସରକାରଙ୍କ ଏଭଳି ପଦକ୍ଷେପକୁ ପ୍ରଶଂସା କରିଛନ୍ତି।
ଶିଶୁ କିଭଳି ସୁରକ୍ଷିତ ରହିବ ସେନେଇ ମହିଳା ଶିଶୁ ବିକାଶ ବିଭାଗ ନିୟମିତ କାର୍ଯ୍ୟ କରୁଛି।ଏଥିପାଇଁ ବିଭିନ୍ନ ଯୋଜନା ପ୍ରଣୟନ ହେବା ସହିତ ଏହାର କାର୍ଯ୍ୟକାରିତା ଉପରେ ଗୁରୁତ୍ୱ ଦେଉଛି ଓଡିଶା ।