ପୁଣି ବିଜେଡିର ବରିଷ୍ଠ ନେତା ବଦ୍ରି ପାତ୍ରଙ୍କ ବିସ୍ପୋରକ ବୟାନ । ଗତକାଲି ପିଇବା ପାଣି ପ୍ରସଙ୍ଗରେ ବିସ୍ଫୋରକ ବୟାନ ଦେଇଥିବା ବଦ୍ରି, ଆଜି ବିଜେଡି ଆଉ ବିଜେପିରେ ଚାଲିଥିବା ନେତାଙ୍କ ଦଳଡିଆଁଙ୍କୁ ନେଇ ଦେଇଛନ୍ତି ପୁଣି ବିସ୍ଫୋରକ ବୟାନ । ଘଷିପୁରାର ଏହି ବିଧାୟକ କହିଛନ୍ତି ଯେ, ଅତୀତରେ ବିଜେଡି ଭୁଲ୍ କରିଛି, ବିଜେପିରୁ ଟିକେଟ୍ ପାଇଥିବା କିଛି ପ୍ରାର୍ଥୀଙ୍କୁ ବିଜେଡିକୁ ଆଣିବାକୁ ଭୁଲ ବୋଲି ଦର୍ଶାଇଛନ୍ତି ବଦ୍ରି ।
ଏଥିସହ ବର୍ତ୍ତମାନ ବିଜେପି ମଧ୍ୟ ସମାନ ଢଙ୍ଗରେ ବିଜେଡିର ସାଂସଦଙ୍କୁ ନିଜ ଦଳରେ ସାମିଲ କରୁଛି । ଏହା ଉଭୟ ଦଳ ପାଇଁ କ୍ଷତିକାରକ ବୋଲି ବଦ୍ରି ପାତ୍ର କହିଛନ୍ତି । ଅନ୍ୟପଟେ ବିଜେଡିକୁ ତେରେଛା ତୀର ମାରି ମଧ୍ୟ ସେ କହିଛନ୍ତି, ଦୀର୍ଘ ବର୍ଷ କ୍ଷମତାରେ ରହିଲା ପରେ, ଗୋଟିଏ ନିର୍ବାଚନମଣ୍ଡଳୀରେ ଆମେ ଭଲ ସବଳ ପ୍ରାର୍ଥୀ ତିଆରି କରିପାରିଥାନ୍ତୁ । ହେଲେ ଅନ୍ୟ ଦଳରୁ ଧାର୍ ଆଣିବା ଭୁଲ୍ ବିଜେଡି କରିଛି ବୋଲି ସେ କହିଛନ୍ତି ।
ତେବେ ପୂର୍ବରୁ ବିଜେଡି ଯାହା କରୁଥିଲା, ଏବେ ବିଜେପି ସେୟା କରୁଛି । ଏହା ବୁମେରାଁ ହେବ, ଆଦର୍ଶ ବଦଳିନଥିବା ଲୋକଙ୍କୁ ରାତି ଅଧରେ ଆଣି ସକାଳେ ପ୍ରାର୍ଥୀ କରିବା କାରଣରୁ, ସେମାନେ ନିର୍ବାଚନ ହାରୁଛନ୍ତି । କାହିଁକି ନା, ଆଦର୍ଶ ଜନିତ ସଙ୍କଟ ରହୁଛି । ସେମାନଙ୍କୁ ଭରସା କରି ଦଳ ଆଗେଇ ପାରିବ ନାହିଁ । ଏହାଦ୍ୱାର ଦଳର ହିଁ କ୍ଷତି ହେଉଛି ବୋଲି ବଦ୍ରି ପାତ୍ର କହିଛନ୍ତି । ତତ୍ ସହିତ ଏହା ଭଲ ପରମ୍ପରା ନୁହେଁ ।
ଅନ୍ୟପଟେ ନବୀନ ପଟ୍ଟନାୟକ ବିଧାନସଭା ଗୃହରେ ଉପସ୍ଥିତ ରହିବାକୁ ନେଇ ପ୍ରତିକ୍ରିୟା ଦେଇଛନ୍ତି ବଦ୍ରି । ସେ କହିଛନ୍ତି, ନବୀନ ବାବୁ ବିଧାନସଭା ଆସିବା ଫଳରେ ଭଲ ମେସେଜ୍ ଯାଉଛି । କର୍ମୀମାନେ ମଧ୍ୟ ଏହାଦ୍ୱାରା ଉତ୍ସାହିତ ହେଉଛନ୍ତି । ତେବେ ଆଗାମୀ ଦିନରେ ନବୀନ ଜିଲ୍ଲା ଗସ୍ତରେ କଲେ ଭଲ ହେବା ସହିତ କର୍ମୀଙ୍କ ମନୋବଳ ବଢିବ ବୋଲି କହିଛନ୍ତି ବିଜେଡିର ଘସିପୁରା ବିଧାୟକ ବଦ୍ରି ପାତ୍ର