ମହାରାଷ୍ଟ୍ର ବିଧାନସଭା ନିର୍ବାଚନ ପାଇଁ ଶେଷ ହେଇଛି ଭୋଟ ଗଣତି । ବିଜେପି ମେଣ୍ଟର ମହାୟୁକ୍ତି ସତ୍ତା ହାସଲ କରିବା ପରେ ନାନାଦି ନୂଆ ତଥ୍ୟ ଦେଖିବାକୁ ମିଳୁଛି । ତେବେ ଏଠାରେ ଥିବା ବର୍ସୋବା ସିଟ ଚର୍ଚ୍ଚାରେ ରହିଛି । ଏଠାରେ ଶିବସେନା ଉଦ୍ଧବ ଠାକରେ ଗୋଷ୍ଠୀର ପ୍ରାର୍ଥୀ ହାରୁନ ଖାନ ୧୬ ଶହ ଭୋଟରେ ବିଜୟୀ ହୋଇଛନ୍ତି । ସେହିପରି ତାଙ୍କ ପଛକୁ ବିଜେପିର ଭାରତୀ ଲାଭେକର ଦ୍ୱିତୀୟ ସ୍ଥାନରେ ରହି ପରାଜିତ ହୋଇଛନ୍ତି । ଆଉ ଏହି ଆସନରେ ଏମିତି ଜଣେ ପ୍ରାର୍ଥୀ ଅଛନ୍ତି ଯିଏକି ସୋସିଆଲମିଡିଆରେ ବେଶ ପରିଚିତ ହେଲେ ଭୋଟ ପାଇଛନ୍ତି ମାତ୍ର ୧୫୫ ଖଣ୍ଡ । ଯାହାକୁ ନେଇ ଏବେ ବେଶି ଚର୍ଚ୍ଚା ହେଉଛି ।
ସେହି ପ୍ରାର୍ଥୀ ଜଣକ ହେଉଛନ୍ତି ବିଗ ବସର ପୂର୍ବତନ ପ୍ରାର୍ଥୀ, ଅଭିନେତା ଆଉ ନିଜକୁ ମୁମ୍ବାଇର ଭାଇଜାନ କହୁଥିବା ଏଜାଜ ଖାନ । ସେ ନାଗିନା ସାଂସଦ ଚନ୍ଦ୍ର ଶେଖର ଆଜାଦଙ୍କ ଦଳ ଆଜାଦ ସମାଜ ପାର୍ଟି ତରଫରୁ ନିର୍ବାଚନ ଲଢିଥିଲେ । ବହୁ କଷ୍ଟରେ ସେ ୩ ଅଙ୍କ ଛୁଇଁ ପାରିଛନ୍ତି ।
ଏଜାଜ ଖାନଙ୍କ ଇନଷ୍ଟାଗ୍ରାମ ଫଲୋଅର୍ସ୫.୬ ମିଲିୟନ ଥିବା ବେଳେ ଫେସବୁକରେ ୪.୧ ମିଲିୟନ ଫଲୋଅର୍ସ ରହିଛନ୍ତି । ହେଲେ ନିଜ ନିର୍ବାଚନ ମଣ୍ଡଳୀରେ ସେ ମାତ୍ର ୧୫୫ ଖଣ୍ଡ ଭୋଟ ପାଇଛନ୍ତି । ଏହି ସଂଖ୍ୟା ନୋଟାଠାରୁ ବହୁତ କମ୍ ।